Linkin Park toparynyň awtorlyk hukugynyň bozulandygy bilen bagly şikaýaty sebäpli, Twitter ABŞ-nyň prezidenti Donald Trampyň bu toparyň aýdymy ýaňlanýan wideorolikli bildirişini aýyrdy. Bu barada “The New Daily” neşiri habar berýär, muny iz.ru ýetirýär.
Bildiriş ABŞ-nyň prezidentiniň kömekçisi, jemgyýetçilik torlarynda aragatnaşyga jogap berýän Deniel Skawino tarapyndan edildi. Amerikan lideri ýazgyny özüniň sahypasynda paýlaşdy. Saýlawdan öňki kampaniýanyň çäklerindäki mahabatlaryň kadry Linkin Park toparynyň aýdymynyň astynda görkezildi. Toparyň agzalary tarapyndan esaslandyrylan Machine Shop Entertainment amerikan aýdym-saz kompaniýasy jemgyýetçilik torunyň wekillerine awtorlyk hukugynyň berjaý edilmeýändigi baradaky arza bilen ýüzlendiler. Mikroblogyň wekilleri ýüzlenmäni ýerine ýetirdiler we bildirişi aýyrdylar.
“Biz awtorlyk hukugynyň eýeleri ýa-da olaryň ygtyýarlandyrylan wekilleri tarapyndan iberilýän delilli şikaýatlara jogap berýäris” – diýip, Twitterde aýdýarlar.
28-nji maýda Tramp jemgyýetçilik torunyň eýelerini ulanyjy postlarynyň mazmunyna jogapkärçilik çekmäge borçly edýän permana gol çekdi. Bellenilip geçilen resminamanyň ýüze çykmagynyň sebäbi Trampyň Twitter bilen çekişmesi boldy. Öň jemgyýetçilik tory Trampyň bir habaryny ýalan mazmunly diýip görkezdi. Tramp jogap hökmünde jemgyýetçilik toruny senzurada aýyplamak bilen, ony ýapjakdygy bilen gorkuzdy. Jemgyýetçilik tory kimdir biriniň garaýşyny basmaýandygyny, diňe olaryň düzgünlerine garşy bolan informasion mazmunlary aýyrýandygyny aýdýar.
Öň, kazyýet arzasy haýbaty bilen The Rolling Stone, Queen, Aerosmith, Panic! At the Disco ýaly toparlar, aýdymçylar Adel we Rianna, sazandalar Nil Ýang, Farrel Uilýams özleriniň aýdym-sazyny Trampa ulanmagy gadagan etdiler.
