Satyjynyň ýalňyşlygy alyjynyň millioner bolmagyna getirdi

Miçigan ştatynyň Istpoýnt amerikan şäherinde ýangyç alynýan menzilde kassa işgäriniň ýalňyşy alyjyny dollarly millioner etdi. Bu barada wane.com portaly habar berýär. Muny lenta.ru ýetirýär.
Özüni tanatmazlyk islän 57 ýaşly amerikan raýaty tekere ýel bermek üçin ýangyç guýulýan ýere bardy. Ol hyzmat üçin töleg edip, gaýtargysyna on dollarlyk Lucky 7 lotereýa petegini sorady. 
“Kassaçy ýalňyşyp, maňa 20 dollarlyk petegi berdi – diýip, ol adam ýatlaýar. – Ol petegi dogrusyna çalşyp bermegi teklip etdi, ýöne nämedir bir zat maňa ilki alan petegimde gal diýýärdi. Şeýle edenime begenýärin!”. 
Netijede ol iki million dollar aldy.
Ýeňiji baýragy her aýdaky töleg görnüşinde almakdan ýüz öwürdi we utuşy tutuş aldy. Salgyt hasaplaşygyndan soň, oňa 1,3 million dollar eline geldi. Ol puly nämä harç etmegi meýilleşdirýändigini anyklaşdyrmady.
Öň, Kanadanyň Ontario welaýatynyň Kombermer obasynyň garry ýaşaýjysynyň kassa işgäriniň ýalňyşlygy esasynda baýandygy habar berildi. 82 ýaşly Maýkl Batt (Michael Butt) dükanda Lotto 6/49 lotereýa petegini sorady, ýöne satyjy tötänden Lotto Max petegini beripdir.