Bütindünýä Saglygy Goraýyş Guramasy özüniň we dürli ýurtlaryň hökümetleriniň COVID-19 pandemiýasyna garşy nähili göreş alyp barýandyklaryna baha bermek üçin garaşsyz bilermenler toparyny döreder. Bu barada BSGG-niň baştutany Tedros Adhan Gebreyesus penşenbe güni 194 agza ýurduň wekilleri bilen geçirilen onlaýn duşuşygyň barşynda habar berdi diýip, "Euronews" ýetirýär.
Ondan öň ol pandemiýanyň ýaýrawynyň çaltlaşýandygyny we şunuň bilen bagly ýagdaýy gözegçilikde saklamagyň köp ýurtlara henizem başartmaýandygyny aýdypdy.
"Bu gözden geçirmegiň wagty: öz ýaşaýan dünýämize göz aýlamagymyz gerek we biz hyzmatdaşlygymyzy berkitmegiň ýollaryny tapmaly, adamlary halas etmek üçin bilelikde işlemeli hem-de pandemiýa bilen bagly ýagdaýy ele almaly" diýip, Tedros Adhan Gebreyesus belleýär.
Täze Zelandiýanyň öňki premýer-ministri Helen Klark we Liberiýanyň öňki prezidenti Ellen Jonson Serlif bilermenler toparyna ýolbaşçylyk etmegi boýun aldylar. Mandat BSGG-niň agza döwletleri bilen bilelikde işlener. Toparyň aralyk hasabaty noýabr aýynda we doly hasabaty maý aýynda bermegine garaşylýar.
