Penşenbe güni Russiýanyň Syýahatçylyk senagaty bileleşiginiň (PCT) prezidenti Andreý Ignatýew Russiýa bilen GDA ýurtlarynyň arasyndaky howa gatnawlarynyň täzeden dikeldilip bilinjekdigini aýtdy. "Halkara uçuşlaryň awgust aýynyň töwereklerinde täzeden başlanmagy mümkin. Dogrusy, gatnawlaryň GDA ýurtlaryna ýola goýulmagy ähtimal" – diýip, Andreý Ignatýew Ural sebitleýin maglumat merkezi TASS-yň metbugat ýygnagynda aýtdy.
Ýadymyzda bolsa, Russiýanyň halkara howa gatnawy 27-nji martda doly ýapylypdy. Ignatýewiň pikiriçe, ýurtda pandemiýa sebäpli syýahatçylyk pudagynyň çeken ýitgisi, takmynan, 1,5 trillion rubl boldy we ony dikeltmek üçin azyndan 1,5 ýylyň gerek bolmagy mümkin.
Soňky maglumatlara görä, koronawirus pandemiýasy bilen baglylykda togtadylan Russiýadan daşary ýurtlara uçuşlar 2020-nji ýylyň tomus möwsüminden soň täzeden ýola goýlup biler.
Türkmenistan şu wagta çenli halkara howa gatnawlarynyň täzeden açylmagynda seresaplylyk çärelerine eýermegini dowam edýär. Pandemiýa meselesi bilen baglylykda, ýurtda şu ýylyň 20-nji iýulyna çenli hiç hili halkara gatnawlar bolmaz.
