Awtoulaglaryň içindäki howa ýokary temperatura çenli gyzar we wiruslary ýok eder. Bu barada auto.mail.ru habar berýär.
“Ford”-dakylar beýle mümkinçiligiň 2013–2019-njy ýyllar aralygynda çykarylan Police Interceptor Utility awtoulaglaryna ornaşdyrylandygyny aýtdylar. Munuň üçin hiç hili goşmaça enjam gerek däl, diňe programma üpjünçiligini täzelemek ýeterlik.
Öz-özüni dezinfeksiýa etmek tertibi şeýle işleýär: hereketlendiriji we howany dolandyrmak ulgamy awtoulagyň içindäki temperaturany Selsiý boýunça 56 gradus gyzgynlykda 15 minut saklaýar. Dezinfeksiýa amala aşyrylýan wagtynda, maşynyň çyralary salonda oturmaly däldigini duýduryp, ýanyp-sönüp durýar. Soň çyralar dezinfeksiýanyň gutarandygyny habar berýär. Şondan soň awtoulagyň içi sowadylýar.
Dezinfeksiýa ulgamyny işjeňleşdirmek üçin, kruiz-kontrol düwmeleriniň ýörite kombinasiýasyny basmaly – bu tötänleýin açmazlyk üçin şeýle düzülipdir. Polisiýa işgärleriniň köplenç tiz kömek wezipesini hem ýerine ýetirmeli bolýandyklary sebäpli, “Ford”-da bu ulgamyň has peýdaly boljakdygyny belleýärler: "Bir gezekde olar koronawirusly hassany hassahana äkitmeli bolup bilerler, ýene bir gezekde bolsa asimptomatik adamyň ulaga münmeli bolmagy mümkin".
Bu usulyň täsiri Ogaýo Döwlet Uniwersitetinde tassyklandy. Awtoulagyň içinde COVID-19-y zyýansyzlandyrmak üçin näçeräk temperaturanyň we näçeräk wagtyň zerurdygyny hem şol ýerde kesgitlenildi. “Ford” bu usulyň kabinadaky wiruslaryň 99%-ini öldürýändigini aýtdy. Galyberse-de, bu usul elde arassalamakdan (himiki serişdeleri ulanmak bilen) has täsirli, sebäbi ol awtoulagyň içinde hatda eliň barmaýan ýerlerindäki wiruslary hem öldürip bilýär.
