Tesla-nyň paýnamalarynyň bahasy on ýylyň içinde 4000%-den gowrak ýokarlandy

29-njy iýunda Tesla kompaniýasynyň NASDAQ amerikan biržasynda paýnamalaryň söwdasyna başlanyna on ýyl doldy. Şu wagtyň içinde Ilon Maskyň kompaniýasy dünýäniň iň gymmat awtomobil kompaniýalarynyň birine we ABŞ-nyň iň gymmat awtokompaniýasyna öwrüldi. Tesla amerikan elektromobilleri öndürijisiniň paýnamalarynyň bahasynyň ösüşi ilkinji ýaýradylan pursatyndan bäri 4000%-den gowraga barabar boldy, bu barada CNBC telekanalyna salgylanmak bilen rossaprimavera.ru habar berýär.
Kompaniýa 2003-nji ýylda esaslandyryldy, ilkinji köpçülige hödürleme (IPO) 2010-njy ýylyň iýunynda geçirildi. Ýaýradylan pursaty bir paýnamanyň bahasy $23,89 möçberde bahalandyryldy, ýöne şu ýylyň 30-njy iýunyna çenli Tesla-nyň bir paýnamasynyň bahasy $1009,35-e barabar boldy. Şeýlelik bilen ösüş 4125%-e deň boldy.
Ýöne kompaniýanyň paýnamasynyň birsydyrgyn ösmändigi bellenilýär, meselem, 2018-nji ýylyň tomsunyň ahyrynda paýnama bahasyndan 30% pese gaçdy. Teslanyň paýnama bahasy 2020-nji ýylyň birinji ýarymýyllygynda Model Y täze krossoweriniň önümçilige goýberilmegi we elektromobilleriň Şanhaýdaky kärhanada çykarylyp başlanmagy bilen 140%-den gowrak ösdi.
Kompaniýanyň onýyllyk ösüşi depgini boýunça ABŞ-nyň öňdebaryjy tehnologik kompaniýalaryndan degişli döwrüň içinde ep-esli öňe geçýär. Apple, Amazon, Netflix – bu kompaniýalaryň ösüşi on ýylyň içinde 3000%-den ýokarlanmady. Ýatlap geçsek, 2020-nji ýylyň iýunynda Tesla kapitallaşdyrmak boýunça awtomobil kompaniýalaryndan, şol sanda bazaryň lideri Toyota ýapon kompaniýasyndan hem öňe geçdi.