«Hemmeler üçin el arassaçylygy» — BSGG bilen ÝUNISEF-iň täze başlangyjy

Bütindünýä saglygy goraýyş guramasy we BMG-niň Çagalar gaznasy el arassaçylygyny saklamaga gönükdirilen “Hemmeler üçin el arassaçylygy” atly bilelikdäki başlangyjyň düýbüni tutdular.
Milli hökümetleri, hususy sektory we halkara hyzmatdaşlary birleşdirýän bütindünýä kampaniýasy, esasanam ilatyň has ejiz gatlagynda arassaçylyk önümleriniň elýeterliligini goldamak we arassaçylyk medeniýetini ösdürmek maksady bilen döredildi.
“El arassaçylygy birnäçe ýokanç keselleriň öňüni almakda elmydama-da möhüm ähmiýete eýedi. Indi dünýä täze COVID-19 ýokanjy bilen göreşýär. Onuň ýaýramagynyň öňüni almak üçin iň täsirli gurallaryň biri el arassaçylygydyr. COVID-19-a gözegçilik etmek üçin el arassaçylygyny hemmeler üçin elýeterli etmeli" - diýip, ÝUNISEF-iň ýerine ýetiriji direktory Henrietta Foret we BSGG-nyň baş müdiri doktor Tedros Adan Gebreýesus bilelikdäki beýanatda belleýärler. Olar ýurtlaryň ýolbaşçylaryny gigiýena, suw üpjünçiligine we sanitariýa, şeýle hem ýokanç keselleriň öňüni almak üçin maýa goýumlaryny artdyrmaga çagyrýarlar.
Şeýlelik bilen, kampaniýanyň çäginde ýurtlar üçin giňişleýin ýol kartalary işlenip taýýarlanylar we el arassaçylygy boýunça global we ýerli tagallalara goldaw bermek üçin serişdeler bölünip berler. Iş topary öz gezeginde bilim alyşmagy-da ýeňilleşdirer we bu ugurdaky global ösüşe gözegçilik eder.
Ýeri gelende bellesek, el gigiýenasy bilen baglanyşykly zyýansyzlandyryjy serişdeler indi Türkmenistanda hem öndürilip başlandy. Bu babatda türkmen bazarynda ilkinji ädim “Täç hil” hususy kärhanasyna degişli. Kärhana ýurtda ilkinji bolup zyýansyzlaşdyryjy gel serişdelerini öndürmäge başlady. Önümler ýurdumyzyň ähli dükanlarynda elýeterli.