Küşt milletparaz sport hasaplanyldy

Küşt oýnunda aklaryň ilkinji bolup göçüm edýänligi Awstraliýa korporasiýasyny iňkise gidirdi - žurnalistler hatda ýörite derňew hem geçirdiler.
“Ýewrosportuň” habar bermegine görä, Awstraliýa teleradioýaýlymlar korporasiýasynyň Sidneý radiostansiýasy küşti milletparaz sport hasaplady. Şunuň bilen baglylykda, korporasiýanyň žurnalistleri ýörite derňew hem geçirdiler. Derňewiň dowamynda olar pikir soraşma gatnaşyjylara şeýle sowal bilen ýüzlendiler: oýunda aklaryň hemişe ilki göçüp başlaýandygy üçin küşti milletparaz sport hasaplap bolarmy?
Bu pikir soraşma gatnaşanlar, oňa gytaklaýyn garaýyşlaryny beýan edenler köp boldy. Küşt boýunça dünýä çempiony Garri Kasparow hem Twitter sosial ulgamyndaky sahypasynda teswir arkaly seslenmek bilen, bu sowala jogap berdi.
Kasparow: "Küşt oýnunyň milletparazlygy sizi alada goýýan bolsa, onda gidiň-de Go oýnaň. Onda garalar ilki göçýär. Galyberse-de, şular ýaly "derňewler" üçin biderek pul sarp edip samsyk görünmekden, şeýtmek has gowudyr" – diýdi.