ÝUNFPA-nyň kampaniýasy: Türkmenistanyň erkekleri zenanlary näme üçin sarpalaýarlar?

Ene, gyz, gelin, uýa her bir erkek göbekliniň durmuşynda iň gymmatly hasaplanýan şahslar. Olaryň gymmaty, arzysy her maşgalada mukaddeslik saýylýar. Her erkek öz ömrüniň hemişelik hemrasyna, perzent-zürýadyna, uýasyna aýratyn hormat bilen garaýar. Bu, elbetde, siziň durmuşyňyzda hem, gürrüňsiz, şeýledir. Bu hormat-sarpanyň näderejededigini açyp görkezmäge bolsa BMG-niň Ilat Gaznasy çagyrýar. Has dogrusy, ÝUNFPA Türkmenistanyň erkeklerini #arzylyzenan (#shecounts) kampaniýasyna gatnaşmaga çagyrýar.
Kampaniýanyň esasy maksady zenanlara berilýän ähmiýeti has aýdyň görkezmek, olaryň jemgyýetiň esasy sütünleriniň biridigine ünsi çekmek bolup durýar.
Öz durmuşyňyzda ähmiýetli hasaplaýan zenanyňyz (gyzyňyz/gelniňiz/uýaňyz) bilen düşen suratyňyzy BMG-niň Ilat Gaznasynyň ýurdumyzdaky wekili Ene Tüýliýewanyň elektron tuyliyeva@unfpa.org salgysyna ibermeli; ol zenany näme üçin arzylaýandygyňyzy beýan etmeli.
Şeýle hem şu aşakdaky aňlatmalary hem ulanyp bilersiňiz:
“Gyzym/gelnim/uýam meniň üçin #arzylyzenan, sebäbi:
•Onuň bahasyna ýetip bolmaýar
• Ol biziň bagt çeşmämiz
• Ol akyly bilen özüni aldyrýar
• Ol öz durmuşyny özi gurýar
• Ol biziň şamçyragymyz
• Onuň sagdynlygy maşgalamyzyň sagdynlygy
• Onuň işi deň jogapkärli
• Ol biziň daýanjymyz/maşgalamyzyň daýanjy
• Onuň kämilligi halkymyzyň bähbidi
ÝUNFPA ugradylan suratlary nusgadaky ýaly taýýarlap, 29-njy iýunda sosial torlarda paýlaşmaga başlar. Şeýle hem size ugradar.