Kazan uniwersitetinde koronawirusa garşy sanjymlary barlagdan geçirip başladylar

Kazan federal uniwersitetinde (KFU) DNK-tehnologiýasynyň esasynda taýýarlanylan COVID-19-a garşy sanjymlary haýwanlarda barlagdan geçirip başladylar. Bu barada KFU-nyň ýokary derejeli anyk we dikeldiji medisinasynyň ylmy-kliniki merkeziniň müdiri Albert Rizwanow habar berdi.
Alymyň aýtmagyna görä, taýýarlanylýan DNK-sanjymda koronawirusyň beloklaryny kodlaýan birbada birnäçe genler saklanýar. Serişde öýjüge goýberilende, ol ony gaýtadan programmalaşdyrýar. Şeýlelik bilen, wirusyň özi däl-de, öýjük aýratyn beloklary döredýär. Organizm olary anyklaýar we antibedenjikleriň döredilmegini işjeňleşdirýär.
Geljek iki aýda barlagçylar bu sanjymlaryň barlaghana haýwanlarynda netijeliligi boýunça ilkinji maglumatlary almaga ynam bildirýärler. Eger-de haýwanlaryň ganynda antibedenjikleriň bardygy ýüze çykarylsa, onda barlaghana işiniň netijeliligi tassyklanylar.
IA REGNUM-yň öň habar bermegine görä, KFU-da “DNK-nyň ylmy-barlag merkezi” awtonom söwda däl guramasy bilen bilelikde koronawirus infeksiýasyna antibedenjikleriň barlygyny ýüze çykarmak üçin test-zolak (test-ulgam) döretmek boýunça barlaghana şertlerinde eksperiment geçirmek üçin taslama işe girizildi. Ýöne bu test ulgamy hem beýleki IFA (Immunoferment analizi) usuly bilen geçirilýän barlaglar ýaly PUR (Polimeraz utgaşykly reaksiýa) usuly bilen geçirilýän barlaglardan tapawutlylykda, COVID-19 häzirki keseli anyklamak üçin niýetlenilen däl. Olar diňe antibedenjikleriň bardygyny görkezýärler, olar bolsa syrkaw adamyň hem, wirus infeksiýasy bilen kesellän, ýöne eýýäm gutulan adamyň hem ganynda bolup bilýär.