Daşary ýurtlarda galan türkmenistanlylar Western Unionyň üsti bilen halkara geçirimlerini alyp bilerler

Türkmenistanda koronawirus pandemiýasy zerarly girizilen çäklendirmeleriň netijesinde ýurdumyza dolanyp bilmeýän watandaşlarymyza kömek bermegiň tertibi kesgitlenildi.
«Turkmenportal» agentliginiň habar bermegine görä, 22-nji iýundan başlap, Türkmenistanyň Merkezi banky DIM-niň Döwlet migrasiýa gullugy bile bilelikde tassyklan sanawyna laýyklykda, aýda 500 dollar konwertirlemäge hukugy bolan daşary ýurtlarda galan watandaşlarymyza “Western Union” arkaly halkara geçirimlere rugsat berildi.
Ýokarda agzalan geçirimler daşary ýurtlarda bilim alýanlara degişli däldir. Daşary ýurtlarda bilim alýan raýatlar üçin geçirim operasiýalary Türkmenistanyň Bilim ministrliginiň tassyklan halkara ýokary okuw mekdepleriniň sanawynyň esasynda fiziki şahslar üçin konwertasiýa etmegiň öň tassyklanan tertibine laýyklykda amala aşyrylar.