“Akylly sagatlary” saglyga gözegçilik ediji ulgama öwrerler

Los-Anjelesde Kaliforniýa uniwersitetiniň hünärmenleri özboluşly ýukajyk plýonkany işläp taýýarladylar, onuň kömegi bilen geljekde “akylly sagatlary” saglyk ýagdaýyna gözegçilik etmek üçin ulgama öwürmek mümkin bolar. Bu barada pravda.ru habar berýär.
Ulgam adamyň bölünip çykýan deri arkaly himiki indikatorlary gözleýär we real wagt režiminde edil häzir adamyň organizminde nämeleriň bolup geçýändigi barada maglumat berýär. Plýonkanyň adamyň hamy bilen galtaşýan ýelmeşegen tarapy adamyň der damjasynyň himiki düzümini ýygnaýar we ony seljerýär. Sagada gönükdirilen beýleki tarapy bolsa kabul edilen himiki signallary elektrik signallaryna öwürýär. Olar hasaplanylýar, gaýtadan işlenilýär we “akylly” sagatlaryň ekranynda şöhlelendirilýär.
Häzirki günde akylly sagatlar eýýäm siziň näçeräk ýoly geçendigiňize, näçeräk ýatandygyňyza, siziň puls ýygylygyňyza gözegçilik etmäge kömek edýär. Täze modeller hatda arterial basyşy kontrollykda saklamagy hem wada berýärler. Smartfon ýa-da beýleki gurluşlar bilen baglanyşykda işläp, akylly sagatlary uzak wagtyň dowamynda saglyk görkezijilerini yzarlamak üçin hem ulanmak bolýar.
Ýöne häzirlikçe bu sagatlar siziň bedeniňiziň himiýasyny kontrollykda saklap bilmeýärler. Munuň üçin olara organizmiň suwuklygynda ýüze çykarylan biomarkerleriň molekulasyny yzarlamak gerek.
Hünärmenler topary hususy akylly sagatlary we ulgam bilen işleşmek üçin programmany döretdiler. Ýöne tehnologiýanyň awtorlary bu konsepsiýanyň birwagtlar akylly sagatlaryň belli modelleri üçin hem ulanylyp bilinjekdigini belleýärler.