ABŞ-nyň döwlet karzy $26 trilliondan geçmek bilen täze rekord goýdy

ABŞ-nyň döwlet karzy çalt depginler bilen ýokarlanýar, ýagny aýda ortaça $1 trln. Bu býujet serişdelerini epidemiýadan zyýan çeken ykdysadyýeti goldamak üçin bölüp aýyrmagyň zerurlygy bilen baglylykda gelip çykýar. ABŞ-nyň maliýe ministriniň maglumatlaryna görä, ABŞ-nyň döwlet karzy täze taryhy rekordy goýdy we ol $26 trilliondan geçdi. Bu barada rbc.ru habar berýär.
9-njy iýunda ýurduň döwlet karzy $26,003 trilliona barabar boldy. US Debt Clock serwisiniň maglumatlary boýunça, soňky birnäçe günüň içinde ol ýene, takmynan, $4 mlrd ýokarlandy. Şeýlelik bilen, döwlet karzy ABŞ-nyň her bir raýatyna hasaplamada $79 müňe barabar bolýar.
Fox News telekanalynyň bellemegine görä, ABŞ-nyň döwlet karzy federal hökümetiň koronawirus epidemiýasy we onuň netijeleri bilen göreşe edýän çykdajylary sebäpli soňky aýlar çalt depginler bilen ösýär. ABŞ-nyň maliýe ministrliginiň maglumatlary boýunça, 7-nji aprelde döwlet karzy $24 trilliondan geçdi. Bir aýdan az wagtdan soň, ýagny 5-nji maýda ol eýýäm $25 trilliona ýetdi.
Býujet ýylynyň başlamagy bilen bir wagtda ABŞ-nyň býujet ýetmezçiligi $1,88 trilliona barabar boldy. Bu 2009-njy ýyldaky dünýä maliýe çökgünligi döwründe goýlan ýurduň býujet ýetmezçiliginiň rekordly ýyllyk görkezijisinden ($1,4 trln) hem ýokarydyr. Kongresiň býujet edarasynyň çaklamalary boýunça, 2020-nji ýylyň jemi boýunça býujet ýetmezçiligi $3,4 trilliona barabar bolar.
ABŞ-nyň döwlet karzynyň ösüşi we býujet ýetmezçiligi Ak öýüň kärhanalary we raýatlary goldamak üçin $2,2 trilliony bölüp aýyrmak baradaky çözgüdiniň esasynda döreýär. Puluň bir bölegi raýatlara göni tölemeklige gönükdirilen: $75 müňden az girdejili adamlar $1,2 müň möçberde çek alarlar, çagaly maşgalalar her bir çaga üçin $500-den alarlar. Serişdeleriň bir bölegi işinden çykanlara gönükdiriler. Mundan başga-da, kärhanalary we ykdysady pudaklary goldamak üçin birnäçe çäreler toplumy göz öňünde tutulan.