Amerikan biznesmeni Ilon Mask SpaceX kompaniýasynyň esasy maksadynyň Starship kosmiki gämini döretmekden ybaratdygyny aýtdy. Ol işgärleri Crew Dragon gämisiniň üstünlikli missiýasyndan soň arkaýynlaşmazlyga çagyrdy, bu barada CNBC telekanalyna salgylanmak bilen lenta.ru habar berýär.
Aýa we Marsa uçmak maksady bilen Starship gämisini döretmek üçin “çalt we derrew” hereket etmek gerek diýlip, kompaniýanyň žurnalistleriň eline düşen korporatiw ýollanmasynda aýdylýar. “Haýyş edýärin, SpaceX üçin birinji orunda Starship kosmiki gämisiniň durýandygyny göz öňünde tutuň” – diýip, Mask işgärlere iberen elektron hatynda belleýär.
SpaceX kompaniýasynda sekiz müň töweregi işgär hasaba alynýar, olaryň esasy bölegi Los-Anjelesdäki ştab-kwartirada ýa-da Kanaweral burnundaky obýektlerde bolýarlar, ýöne käbirleri Boka-Çika (Tehas) obasynyň golaýyndaky hususy kosmodromda işleýär. “Göçmek mümkinçiligini göz öňünde tutýanlar üçin biz hemişe ýörite uçar hödürläris” – diýip, Mask işgärleri ady agzalan kosmodroma golaý göçmäge çagyrmak bilen ýazýar.
CNBC telekanalynyň maglumatlary boýunça, ýylyň birinji ýarymynda SpaceX-iň bahasy, takmynan, 36 milliard dollara çenli ýokarlandy. 2019-njy ýylyň başyndan bäri hususy kompaniýa 1,7 milliard dollar möçberde maýa goýumy özüne çekmegi başardy, bu serişdäniň bir bölegi köp gezeklik kosmiki enjamy döretmek boýunça taslamanyň ösdürilmegine gönükdiriler. Maý aýynyň ahyrynda kompaniýanyň Starship SN4 üçünji prototipiniň synagy şowsuz tamamlandy, synag wagtynda ýangyç akdy, netijede gämi ýaryldy.
Öň, SpaceX NASA-dan adamlary kosmosa eltmek üçin Crew Dragon kosmiki kapsulyny gaýtadan ulanmaklyga rugsat aldy. 31-nji maýda Floridadaky Jon Fisjerald Kennedi adyndaky kosmiki merkeziň territoriýasynda 39-njy badalga alyş toplumyndan Halkara kosmiki stansiýa ugran Crew Dragon ekipažy HKS-na üstünlikli geçdi.
Ilon Mask SpaceX kompaniýasynyň esasy maksadyny aýtdy
- 08.06.2020 22:41
- 2.4k+
![Ilon Mask SpaceX kompaniýasynyň esasy maksadyny aýtdy](https://tmcars.info/tmcars/images/original/2020/06/09/05/35/4f4038b8-43d8-43d3-b257-ffc46d4f6a71.jpg)