Tramp koronawirus sebäpli girizilen çäklendirmeleri aýyrmagyň zerurlygyny aýtdy

ABŞ-nyň Prezidenti Donald Tramp ýurtda COVID-19 koronawirusy sebäpli girizilen çäklendirmeleri aýyrmagyň wagtynyň gelendigini aýtdy. Bu barada kommersant.ru habar berýär. “Biz öňki ýagdaýymyza dolanýarys, biz ýurdy açýarys” – diýip, Tramp aýdýar. Onuň pikiriçe, Birleşen Ştatlar pandemiýa döwrüni geçirdi. Ol birnäçe ştatlaryň häzire çenli berk çäklendirmeleri saklaýan gubernatorlaryny tankytlady.
“Men olaryň näme üçin ýapylmagyny dowam etdirýändigini bilemok. Biz bu zatlaryň ählisini tamamlamak isleýäris” – diýip, Tramp metbugat maslahatynda aýdýar. Ol Jorjiýanyň, Günorta Karolinanyň, Floridanyň we beýleki birnäçe ýerleriň eýýäm açylandygyny habar berdi. Şeýle-de, ol ABŞ-nyň ykdysadyýetine geljek birnäçe aýda ösüş garaşýandygyny aýtdy. “Meniň pikirimçe, bize örän gowy awgust, örän gowy iýul we üýtgeşik sentýabr garaşýar... we indiki ýyl hem biziň ykdysady meýilnamamyzda bolan iň gowy ýyllaryň biri bolar”. Donald Tramp işsizligiň derejesiniň aprel aýynda 13,3%-e çenli peselendigini hem nygtap geçdi.
Mundan başga-da, Tramp ABŞ-nyň kompaniýalarynyň koronawirusa garşy sanjym döretmek işinde “uly üstünliklere” ýetendigini belledi. Onuň aýtmagyna görä, 2 mln doza eýýäm iberilmäge taýýar, bu iş hem sanjym howpsuzlyk üçin barlagdan geçeninden soň amala aşyrylar. COVID-19-a garşy sanjymlary we dermanlary döretmegiň üstünde ýedi-sekiz kompaniýa üstünlikli zähmet çekýär.
ABŞ-da soňky wagt koronawirusyň täze ýagdaýlarynyň sany azalýar. Ýurtda 1,9 mln kesel ýagdaýy hasaba alyndy, 485 müň adam sagaldy, 108 müň adam ýogaldy.