Şu gün bütin dünýäde bolşy ýaly, Türkmenistanda giňden bellenilip geçilen Bütindünýä welosiped gününde paýtagtymyzyň günortasynda «Welosiped» binasynyň açylyş dabarasy boldy. Prezident Gurbanguly Berdimuhamedowyň gatnaşmagynda geçirilen açylyş dabarasy köpçülikleýin welosipedli ýörişlere we dürli sport çärelerine badalga boldy.
12 kilometrlik köpçülikleýin welosipedli ýöriş Aşgabadyň merkezinde Döwlet münberiniň öňünde tamamlandy.
Ýatladyp geçsek, Bütindünýä welosiped güni Türkmenistanyň başlangyjy bilen 2018-nji ýylyň aprelinde BMG-niň Baş Assambleýasynyň 72-nji mejlisinde esaslandyrylypdy. «Bütindünýä welosiped güni» Rezolýusiýasynyň awtordaşlary hökmünde 56 döwlet çykyş edip, resminama 198 döwletiň ählisi tarapyndan biragyzdan kabul edildi.
2021-nji ýylda Aşgabatdaky Olimpiýa şäherçesinde welotrek boýunça dünýä çempionaty geçiriler. Türkmen paýtagty trek welosport boýunça dünýä çempionatyny kabul etjek Aziýa yklymyndaky üçünji şäherdir. Öň bu ýaryşlar Ýaponiýanyň Maebasi we Hytaýyň Gonkong şäherlerinde geçirildi.
Türkmenistanda Bütindünýä welosiped güni bellenilip geçildi
- 03.06.2020 22:10
- 5.5k+
