Hytaý koronawirusyň gelip çykyşy barada täze pikiri tassyklady

Hytaýyň Kesellere gözegçilik we öňüni alyş merkeziniň müdiri Gao Fu koronawirusyň gelip çykyşy barada täze pikiri tassyklady, oňa laýyklykda bu kesel Hytaýyň Uhan şäheriniň bazarynda ýüze çykmady. Bu barada Trend “Lenta.ru” salgylanmak bilen habar berýär.
“Ilkibaşda biz deňiz önümleriniň bazarynda wirus döräp biler diýip çaklapdyk” – diýip, ol aýdýar. Gao bazarda alnan haýwanlaryň analizinde wirusyň yzynyň ýokdugyny düşündirdi. Ýöne olar beýleki birnäçe nusgalarda, şol sanda akýan hapa suwuň nusgasynda ýüze çykaryldy. Şeýlelik bilen, ol wirus Uhan bazarynda “ýüze çykmazyndan birnäçe wagt öň hereket edipdir” diýip çak etdi.
Mundan başga-da, Gao täze görnüşli koronawirusyň adamlara geçip bilýän beýleki wiruslaryň arasynda ýedinjidigini belledi. “Ýöne bu wirusyň özüni alyp barşy beýlekilere meňzeş däl” – diýip, ol aýdýar.
29-njy martda Hytaýyň Kesellere gözegçilik we öňüni alyş boýunça merkeziniň alymlary koronawirusyň Uhanyň deňiz önümleri bazarynda ýüze çykandygy baradaky pikiri ýalana çykardylar. Olar keseliň ilkinji çeşmeleri hasaplanan ýerlerden nusgalary barlagdan geçirdiler we infeksiýanyň yzyny tapmadylar. Muňa garamazdan, wirusyň adama ýarganatlardan geçendigi baradaky pikir bolsa tassyklanyldy.
Soňky maglumatlar boýunça, dünýäde koronawirus bilen kesellänleriň sany 6 milliondan gowrak, olaryň 369 müňden gowragy ýogalan, 2,5 milliondan gowragy sagalan. Täze görnüşli koronawirusyň ýüze çykaran COVID-19 pandemiýasynyň ýaýrawy ilkinji gezek Uhan şäherinde 2019-njy ýylyň dekabrynda bellige alyndy. 11-nji martda Bütindünýä saglygy goraýyş guramasy ýagdaýy pandemiýa hökmünde häsiýetlendirip boljakdygyny yglan etdi.