GDA-nyň hökümet Baştutanlary koronawirus pandemiýasyna garşy göreş meselesini maslahatlaşdy

29-njy maýda Gurbanguly Berdimuhamedowyň tabşyrygy boýunça Türkmenistanyň wekiliýeti Garaşsyz Döwletleriň Arkalaşygyna gatnaşyjy ýurtlaryň göni wideoaragatnaşyk arkaly geçirilen hökümet Baştutanlarynyň Geňeşiniň nobatdaky mejlisine gatnaşdy.
GDA gatnaşyjy ýurtlaryň hökümet Baştutanlarynyň Geňeşiniň şu gezekki mejlisiniň barşynda Arkalaşygyň ýurtlarynyň hyzmatdaşlygyna degişli ykdysadyýet, ulag, energetika, ynsanperwer-medeni ulgam, ýaşlar syýasaty ýaly ugurlar we beýleki birnäçe ulgamlarda meseleleriň giň toplumyna garaldy.
Koronawirus pandemiýasyna garşy göreşmek ara alnyp maslahatlaşylan esasy meseleleriň biri boldy.
Türkmen tarapynyň belleýşi ýaly, mejlisiň gün tertibi häzirki tapgyrda we geljekde hyzmatdaşlygyň möhüm wezipelerini öz içine alýar. Şolaryň hatarynda GDA-nyň çäklerinde ykdysady hyzmatdaşlyk meseleleri has möhümdir.
Mejlisiň barşynda koronawirus pandemiýasyna garşy göreşde tagallalary birleşdirmek meselesi boýunça ýurdumyzyň garaýşy hem beýan edildi. Şunuň bilen baglylykda, ýokanjyň ýaýramagynyň öz wagtynda we netijei öňüni almaga mümkinçilik berýän hyzmatdaşlygyň täsirli gurallaryny işläp taýýarlamagyň möhümdigi bellenildi. Hususan-da, gürrüň GDA döwletleriniň arasyndaky serhetlerde sanitar-karantin çärelerini üpjün etmek boýunça hereketleri utgaşdyrmak barada barýar.
Ýurdumyz ýakyn wagtlarda COVID-19-a garşy göreş boýunça bilelikdäki çäreleri ara alyp maslahatlaşmak üçin oňa BSGG-niň Ženewadaky merkezi edarasynyň ýolbaşçylaryny çagyrmak bilen, GDA ýurtlarynyň ugurdaş ministrlikleriniň ýolbaşçylarynyň duşuşygyny geçirmek hakynda pikir etmegi teklip edýär.