Xiaomi adamyň beýnisini kompýutere birikdirmegi meýilleşdirýär

Xiaomi hytaý elektronika öndürijisiniň bölünip aýrylan kompaniýasy hasaplanylýan Huami adam beýnisini öwrenmek boýunça barlaghananyň döredilendigi barada habar berdi. Täze barlaghananyň esasy wezipesi beýni bilen kompýuteriň arasyndaky mümkin bolan arabaglanyşygy derňew etmekden ybarat. Muny planet-today.ru ýetirýär.
Beýnini we emeli intellekti öwrenmek boýunça barlaghana Hytaýyň Ylmy-tehniki uniwersitetiniň alymlary bilen hyzmatdaşlykda guraldy. Barlaghananyň işgärleri hem inwaziw, hem inwaziw däl eksperimentleri geçirer, onuň çäginde adamyň beýnisini kompýuter interfeýsine birikdirmek mümkinçilikleri seljeriler. Şeýle tejribeler täze tehnologiýaly düýpli integrasiýa esaslanan täze nesliň saglygy goraýyş modelini döretmäge mümkinçilik berer diýlip çaklanylýar. Hünärmenler gerek bolan maglumatlary almak üçin beýnini kompýutere birikdirerler. Ýöne ilkibaşda ähli eksperimentler barlaghana haýwanlarynda geçiriler.
Barlaghananyň işiniň birinji tapgyrynda garaguş keseliniň anyk markerlerini ýüze çykarmaga gönükdirilen derňewler alnyp barylar. Alymlar keseli doly anyklamak üçin enjam hem-de täze terapewtiki serişdeleri döretmegi meýilleşdirýärler.
Geljekde barlaghananyň işgärleri beýni - kompýuter görnüş interfeýsinde doly derejede ünsi jemlärler. Barlaghananyň wekilleri bu barlaghananyň innowasiýa üçin ýer boljakdygyny, onuň esasynda bolsa aspirantlar üçin okuwlaryň alnyp baryljakdygyny hem-de dürli patentleriň bellige alynjakdygyny habar berdiler.
Ýatladyp geçsek, öň şeýle interfeýsi beýnä ornaşdyrmak üçin çipleri taýýarlaýan Neuralink kompaniýasyny esaslandyran amerikan telekeçisi Ilon Mask anons etdi.