BSGG Hytaýa koronawirusyň gelip çykyşyny öwrenmek üçin topar iberer

Bütindünýä saglygy goraýyş guramasy (BSGG) koronawirusyň gelip çykyşyny öwrenmek maksady bilen Hytaýa missiýa iberer. Bu barada saglygy goraýyş pudagynda adatdan daşary ýagdaý boýunça BSGG-niň meýilnamasynyň müdiri Maýkl Raýan habar etdi. Bu barada iz.ru belläp geçýär.
“Biz Hytaýdaky kärdeşlerimiz bilen maslahatlaşmak işini alyp barýarys. Meniň düşünişime görä, ylmy missiýanyň anyk senesi heniz belli edilenok. Ýöne biz dürli ýurtlaryň ylmy wekilleriniň gatnaşmagynda şeýle missiýany geçirmek işiniň tiz mümkin bolmagyna garaşýarys” – diýip, guramanyň Twitterinde onuň sözi getirilýär.
Raýanyň aýtmagyna görä, missiýanyň wezipesi “koronawirusyň gelip çykyşyna düşünmekde” jemlener. Ol Hytaýyň şeýle çemeleşme üçin açykdygyny hem sözüniň üstüne goşdy.
BSGG-niň baş müdiri Tedros Adanom Gebreýesus şeýle derňewi geçirmek bilen ähli taraplaryň gyzyklanýandygyny belledi. “Sebäbi wirusyň gelip çykyşyny öwrenmek bilen, biz onuň geljekde ýüze çykmasynyň öňüni alarys” – diýip, Gebreýesus belleýär.
Maý aýynyň başynda ABŞ-nyň prezidenti Donald Tramp Hytaýyň Uhan şäheriniň barlaghanasynda döredilendigi baradaky maglumata eýedigini habar berdi. “Her hili geň ýagdaýlar bolup geçýär, ýöne köp sany derňewler geçirilýär. Biz hem muny anyklamakçy bolýarys” – diýip, amerikan lideri aýdýar. Öz nobatynda ABŞ-nyň döwlet sekretary Waşingtonda wirusyň emeli gelip çykyşyna “uly subutnamanyň” bardygyny habar berdi.
Şonuň bilen birlikde amerikan alymlary barlaghana şertlerinde COVID-19-y döredýän SARS-CoV-2 koronawirusyň döredilendigi baradaky pikirleri ýalana çykardylar.