SpaceX ilkinji astronawtlaryny kosmosa goýberer

SpaceX kompaniýasy özüniň ilkinji astronawtlaryny Crew Dragon gämisinde 27-nji maýda uçurar. Bu barada popmech.ru habar berýär.
NASA-nyň astronawtlary Robert Benken (49 ýaş) we Daglas Harli (53 ýaş) geçen hepde taýýarlanma işiniň soňky tapgyryny tamamladylar. 27-nji maýda goýberilişik NASA-nyň şatlynyň 2011-nji ýyldaky iň soňky uçuşyndan bäri astronawtlaryň Kennedi kosmodromyndan ilkinji iberilişigi bolar. 2 minut 33 sekuntdan soň birinji basgançagyny, şundan 10 minutdan soň ikinji basgançagyny aýyrmak meýilleşdirilýär.
Şeýle hem bu uçuş hususy kompaniýanyň astronawtlary orbita ibermekde ilkinji synanyşygy bolar. Mundan öň kosmiki missiýalar Russiýa, ABŞ we Hytaý ýaly döwletler tarapyndan alnyp barylýardy.
Hususy kosmiki enjamlary taýýarlamak işine gönükdirilen söwda ekipažlarynyň meýilnamasy birnäçe ýyl mundan öň başlandy. Tramp munda kosmosda hem harby, hem raýat amerikan agalygyny dikeltmek mümkinçiligini görýär. SpaceX bilen hyzmatdaşlyk edip başlanyndan bäri NASA Ilon Maskyň kompaniýasyna kosmiki enjamlaryň gurluşygy üçin $3 milliarddan gowrak berdi.
Emma berk özara gatnaşyga garamazdan, SpaceX öz ýolundan gidýär we bu işi ýerlikli ýerine ýetirýär. Ilon Mask uçuşyň guramaçylygyny hem özüniň gözegçilik astyna aldy: hatda uçuş meýdançasyna-da astronawtlary Tesla kärhanasynyň elektromobilinde, ýagny Tesla Model X-de elterler. Şeýle-de, astronawtlar hususy eşige eýe bolarlar.
Uçuş 27-nji maýda Gündogar kenarýakasynyň wagty boýunça sagat 16:33-e (Moskwa sagady boýunça 28-nji maý, 0:33) meýilleşdirilen. Onuň goýberilişine prezident Donald Trampyň özüniň hem gelmegine garaşylýar, uçuşy görmäge isleg bildirýänler ony NASA-nyň we SpaceX-iň saýtlarynda onlaýn görnüşde görüp bilerler.
Aeronawtika we kosmiki giňişligini derňewden geçirmek boýunça Milli edarasynyň (NASA) öz saýtynda habar bermegine görä, gämi orbitada 100 gije-gündiz töweregi saklanmaga ukyply, ýöne häzirki uçuşyň dowamlylygy gijräk kesgitlener.