Kaliforniýada stadionlary täze awtomobiller üçin ammarlara öwürdiler

Kaliforniýanyň “Enjel” we “Dojer” stadionlaryny, şeýle-de Santa Anita aýlawyny alynmadyk täze awtomobiller üçin ammarlara öwürdiler, bu barada “Los Angeles Times” neşirine salgylanmak bilen rossaprimavera.ru habar berýär.
Koronawirus pandemiýasy Birleşen Ştatlaryň ykdysadyýetine düýpli urgy urdy, esasanam, syýahatçylyk gurşawy zyýan çekdi. Adamlar indi syýahat edip bilenoklar, şonuň üçin ýüz müňlerçe kireýne berilýän ulaglar alynman galdy.
Sport meýdançalaryna Toyota kompaniýasynyň awtosalonda goýulmadyk täze ulaglary, şeýle-de kireýne berilýän awtomobiller daşalýar. Stadionlar ammar hökmünde saýlanylan, sebäbi ýurtda koronawirus ýaýrawy sebäpli ähli sport çäreleri ýatyryldy. Toyota kompaniýasy Long-Biç portunyň öňündäki ýerleri kärendesine almak kararyna geldi. Bu ýerde Los-Anjelese eltilen, ýöne hereket edýän çäklendiriji çäreler sebäpli dilerlere ýetirilmedik ulaglar ýerleşdirildi.
Dowam edýän çökgünlik sebäpli awtosalonlar ýapyk bolmagynda galýar, port meýdançalary bolsa eýýäm doly, şonuň üçin ýapon awtoöndürijisi wagtlaýyn ammar hökmünde stadionlaryň öňündäki ýerleri kärendesine aldy. ABŞ-da täze awtomobilleriň satuwy hem pese gaçdy, bu bolsa dürli ýerlerde üýşýän ulaglaryň artykmaçlygyny emele getirdi.
Ýatladyp geçsek, bortunda iki müň sany Nissan we Infiniti awtomobilleri bolan ýük gämisi bir hepdeläp Los-Anjelesiň kenarynda hereket etmeli boldy, sebäbi port ýüki kabul edip bilmedi. Ähli ammarlar doludy we täze ulaglary ýerleşdirmäge ýer ýokdy.