Ýaponiýanyň köp böleginde “adatdan daşary ýagdaý” režimi ýatyryldy

Ýaponiýanyň premýer-ministri Sindzo Abe ýurtda koronawirus pandemiýasy sebäpli girizilen “adatdan daşary ýagdaý” režiminiň 47 prefekturanyň 39-synda aýrylýandygyny mälim etdi. Bu çözgüt koronawirusa garşy çäreler boýunça hökümet ştabynyň mejlisinde resmi taýdan tassyklanyldy we ol goldanylandan soň göni güýje girdi. Bu barada turbo.gazeta.ru habar berýär.
“Şu günden başlap biz kadaly gündelik durmuşymyza dolanmaga başlaýarys. 39 prefekturada hökümet keseliň dörän ýerine baglylykda düýpli çäreleri kabul etmek bilen wirusyň ýaýrawyny gözegçilik astyna almagy başardy” – diýip, premýer-ministr belleýär. Onuň aýtmagyna görä, “adatdan daşary ýagdaý” režimi dowam edýän galan sekiz prefekturada bu režimiň wagtyndan öň aýrylmagy baradaky çözgüt hünärmenler toparynyň mejlisiniň jemi boýunça 21-nji maýdan ir kabul edilmez.
“Adatdan daşary ýagdaý” režiminiň Tokioda we Osakada dowam etdiriljekdigi bellenilýär. Şeýle-de, bu režim Tokio ýakyn bolan Kanagawa, Saýtama we Tiba köp ilatly prefekturalarda dowam eder. Bularyň ählisi “Uly Tokionyň zonasyny” emele getirýär. Çäklendiriji çäreler Ýaponiýanyň günbataryndaky Kioto, Hýogo we Hokkaýdo demirgazyk prefekturalarynda hem güýjünde galar. “Adatdan daşary ýagdaý” režimi saklanylýan sebitlerde 60 mln-dan gowrak adam ýaşaýar, olaryň 38 milliony paýtagtda we oňa ýakyn bolan prefekturalarda ornaşan.
“Adatdan daşary ýagdaý” režimi Ýaponiýanyň birnäçe etraplarynda aprel aýynyň başynda bir aýlyk girizildi, soňra bu režim 31-nji maýa çenli möhleti bilen ýurduň ähli territoriýasyna ýaýradyldy. Bu onuň güýje gireninden bäri çäklendiriji çäreleriň ilkinji gowşadylyş ýagdaýydyr.
Soňky maglumatlar boýunça, Ýaponiýada koronawirus 16 049 adamda ýüze çykaryldy, 678 adam ýogaldy, 8 920 adam bolsa sagaldy.