748-nji atyjylyk polkunyň söweşjeň baýdagy Russiýa Federasiýasyndan ýurdumyza getirildi

Russiýa Federasiýasynyň Goranmak ministrliginiň wekiliýeti Beýik Ýeňşiň 75 ýyllygy mynasybetli Türkmenistanda geçirilýän dabaraly harby ýörişe gatnaşmak üçin ýörite Moskwa – Aşgabat uçuş gatnawyna degişli uçarda Aşgabada geldiler. Bu barada «Milli goşun» žurnalynyň saýty habar berýär.
Myhmanlary adatça bolşy ýaly, Türkmenistanyň Ýaragly Güýçleriniň Aýratyn hormat garawuly batalýonynyň esgerleriniň hatary garşylady. Olar Beýik Watançylyk urşy döwründe hormatly Belent Serkerdebaşymyzyň mähriban atasy Berdimuhamet Annaýewiň gulluk eden 748-nji atyjylyk polkunyň söweşjeň baýdagy getirdiler.
Hormatly Belent Serkerdebaşymyzyň mähriban atasy Berdimuhamet Annaýewiň söweşen 748-nji atyjylyk polkunyň söweşjeň baýdagynyň biziň ýurdumyza getirilmegi – hormatyň we dostlugyň nyşany. Şonuň üçin-de, dabaraly Ýeňiş ýörişiniň Aşgabatda geçirilmegini türkmen – rus ynsanperwer hyzmatdaşlygynyň ösüşiniň täze tapgyry diýip atlandyryp bolar.
Olar baýdagy belent parladyp, Beýik Watançylyk urşunyň 75 ýyllygy mynasybetli «Halk hakydasy» ýadygärlikler toplumynda harby ýörişden geçdiler.