Gurbanguly Berdimuhamedow Goşulyşmazlyk hereketiniň döwletleriniň alym-lukmanlarynyň geňeşini döretmegi teklip etdi

COVID-19 meselesi häzirki döwürde döwletleriň guramaçylyk, ahlak, maliýe we maddy taýdan özara goldawynyň we kömeginiň köptaraplaýyn tagallalaryň örän möhüm tarapy bolup durýar. Bu barada Prezident Gurbanguly Berdimuhamedow Goşulyşmazlyk hereketiniň sanly wideoaragatnaşyk arkaly geçirilen ýokary derejedäki duşuşygynda eden çykyşynda belledi. Şeýle kömek berlende, hiç bir ýagdaýda onuň syýasylaşdyrylmagy, kemsitmek, haýsydyr bir şertleri öňe sürmek kabul ederlikli däldir.
Pandemiýa we onuň ýaramaz netijelerine garşy göreşde ýokary derejeli hünärmenleriň ysnyşykly işlemeginiň örän uly ähmiýeti bardyr diýip, türkmen Lideri sözüni dowam etdi. Bu ugurda ylmy diplomatiýanyň usullaryny doly derejede ulanmak gerek. Bu bolsa keseli bejermegiň we onuň öňüni almagyň usullary boýunça hemişe tejribäni, bilimleri we maglumatlary, şeýle hem lukmançylyk serişdelerini we enjamlaryny, şahsy gorag serişdelerini alyşmagy aňladýar. Şunuň bilen baglylykda, döwlet Baştutany Goşulyşmazlyk hereketiniň döwletleriniň alym-lukmanlarynyň geňeşiniň döredilmeginiň maksadalaýyk boljakdygyny belledi.