Türkmenistanyň Prezidenti epidemiýa garşy raýdaşlykda göreşmek boýunça maksatnamalaýyn resminamany kabul etmegi teklip etdi

Türkmenistanyň Prezidenti Gurbanguly Berdimuhamedow Goşulyşmazlyk hereketiniň ýokary derejedäki duşuşygynda eden çykyşynda epidemiýa garşy göreşde gurama agza döwletleriň raýdaşlyk işiniň esasy ýörelgelerini öz içine aljak maksatnamalaýyn resminamany kabul etmegi teklip etdi.
Gurbanguly Berdimuhamedow wideoforumda çykyş edip, adamzat üçin uly wehim bolan COVID-19 meselä bagyşlanan bu gezekki ýokary derejedäki duşuşygy geçirmek başlangyjyny öňe sürendigi üçin Prezident Ilham Aliýewe minnetdarlyk bildirdi.
Türkmen Lideri Goşulyşmazlyk hereketiniň bu meseläniň çözülmeginden daşda durup bilmejekdigine ynanýandygyny aýtdy. Bu çäre pikir alyşmaga we çylşyrymly ýagdaýa baha bermäge hem-de ony ýeňip geçmegiň ýollaryny maslahatlaşmaga mümkinçilik berýär.
Pandemiýa garşy netijeli göreşmek bütin halkara bileleşiginden bilelikdäki, umumy we raýdaşlyk hereketlerini talap edýär. Bu barada aýtmak bilen, Gurbanguly Berdimuhamedow hut raýdaşlyk hereketlerini aýratyn bellemek isleýändigini nygtady.
Sebäbi, her ýurduň milli derejede, ýagdaýa baglylykda bu howply ýokanjyň ýaýramagyna garşy öz işlerini ýola goýýandygy düşnüklidir. Şunuň bilen birlikde, ýekelikde gysga wagtlyk wezipeleri çözüp, tapgyrlaýyn üstünlikleri gazanyp boljakdygyna ynanýandygyny belläp, milli Liderimiz bu epidemiýanyň ählumumy howpdugyny, şoňa görä-de, onuň ählumumy hereketleri talap edýändigini, hemmetaraplaýyn häsiýetli, uzak möhletleýin strategiýany öz içine alýandygyny aýtdy.
Şunuň bilen baglylykda, döwlet Baştutanymyz dünýäniň ykbaly üçin umumy jogapkärçilik bilen birleşen 120 döwleti öz içine alýan Goşulyşmazlyk hereketiniň çäklerinde maksatnamalaýyn resminamany işläp taýýarlamagy hem-de kabul etmegi teklip etdi we bu resminamanyň epidemiýa garşy göreşde agza döwletleriň raýdaşlyk işiniň esasy ýörelgelerini, şeýle hem ýokanjyň öňüni almaga we ony ýok etmäge gönükdirilen çäreleriň toplumyny öz içine almalydygyny belledi.