Alymlar semreme bilen kalsiý ýetmezçiliginiň arasyndaky baglanyşygy ýüze çykardylar

Kalsiý adamyň saglygy üçin örän möhümdir. Ýürek, süňk, myşsalar, nerw tutuş ömrüň dowamynda bu mikroelemente mätäçlik çekýärler.
Kanadanyň barlagçylary kalsiýniň kömegi arkaly artykmaç agram bilen netijeli göreşip boljakdygyny anykladylar. Bu mikroelementiň ýetmezçilik eden ýagdaýynda beýni organizme kaloriýanyň köp mukdaryny kabul etmäge itergi beriji signaly iberýär.
Lawalýa uniwersitetiniň alymlary meýletinçileriň kömegi bilen uly göwrümli derňew işini geçirdiler. Olar adam beýnisiniň kalsiý ýetmezçilik eden ýagdaýynda onuň ätiýaçlyk gorunyň üstüni doldurmaga synanyşýandygyny anykladylar. Netijede, adam kaloriýaly önümleri iýesi gelýär. Bu barada volg.mk.ru saýtynda bellenilip geçilýär.
Maglumatlary seljermek bilen ekspertler artykmaç agramly aýallaryň ýarysynda mikroelementiň ýetmezçiliginiň bardygyny bildiler. Alymlar kalsiý ýetmezçiliginiň holesteriniň derejesiniň ýokarlanmagyna we gowşak jynsyň wekilleriniň biliniň ýognamagyna getirýändigini subut etdiler. Mundan başga-da, kalsiý ýetmezçiligi ýürek keselleriniň hem güýçlenmek howpuna getirýär.
Islendik ýaşda-da kalsiýniň ýeterlik möçberiniň organizme gündelik düşmesini üpjün etmelidigini ýatdan çykarmaly däldir. Lukmanlar horlanmak isleýän adamlara peýniriň gaty hilini özleriniň berhizine goşmagy maslahat berýärler.