Italiýanyň hökümeti karantin režiminiň gowşadylýandygyny habar berdi

Italiýa 4-nji maýdan koronawirus epidemiýasy bilen göreşmek üçin öň girizilen çäklendirmeleri gowşatmak boýunça birnäçe çäreleri öz içine alýan “ikinji döwrüne” geçýär. Bu barada ýurduň premýer-ministri Juzeppe Konte metbugat maslahatynda habar berdi diýip, Regnum agentligi belleýär.
Ol 4-nji maýdan Italiýada ýerli hökümetler rugsat berse, gezelenç üçin şäher seýilbaglaryny we seýilgähleri açmak işiniň meýilleşdirilýändigini belledi. Mundan başga-da, ýurduň ýaşaýjylaryna sosial aradaşlygy berjaý etmek bilen indiwidual fiziki türgenleşikler bilen meşgullanmaga rugsat berler, şeýle-de professional sport bölümleri hem öz işini dikelder.
“Ýöne halky üýşürmeklige gadaganlyk galýar. Hususy we jemgyýetçilik şagalaňlaryny gurnamaga rugsat berilmeýär” – diýip, Konte belleýär. Premýer-ministr okuw ýylynyň ahyryna çenli bilim edaralaryny açmak mümkin bolmaz diýip mekdepler baradaky soraga hem gutarnykly jogap berdi.
Premýer-ministriň aýtmagyna görä, 18-nji maýa çenli sebitara hereketlere çäklendirme dowam eder, eger-de gatnaw zerurlygy ýüze çykan ýagdaýynda, ilki bilen, onuň maksadyny anyklamaly bolar. Ownuk haryt dükanlarynyň we muzeýleriň açylmagyna-da 18-nji maýa, gözellik salonlarynyň, dellekhanalaryň, barlaryň we restoranlaryň açylmagyna bolsa 1-nji iýuna çenli garaşmaly bolar.
Italýanlara ene-atalaryny görmek üçin gatnawy amala aşyrmaga rugsat berler, ýöne duşuşykda-da howpsuzlyk çäreleri berjaý edilmeli bolar, bolmasa keseliň täzeden güýçlenmegi ahmal.
Hökümet ýolbaşçysy her bir kärhananyň, ilkinji nobatda, hökmany bolan adamlaryň arasyndaky 1 m aradaşlyk bilen bir hatarda, howpsuzlyk çäreleriniň degişli normalaryny üpjün etmelidigini nygtady. Mundan başga-da, medisina maskalarynyň dakylmagy hem hökmanydyr.
 “Eger-de sen Italiýany gowy görýän bolsaň, distansiýany berjaý et” – diýip, Konte belleýär.