Gurbanguly Berdimuhamedow paýtagtymyzyň metjidinde agzaçar sadakasyny berdi

Prezident Gurbanguly Berdimuhamedow mukaddes Oraza aýynyň birinji gününde Aşgabadyň Parahat-7 ýaşaýyş toplumynda ýerleşen metjitde agzaçar sadakasyny berdi.
Metjidiň içinde Beýik Biribardan türkmen topragyna parahatçylyk we asudalyk, halkymyza agzybirlik we jebislik, Gurbanguly Berdimuhamedowa berk jan saglyk we uzak ömür, köpugurly işinde täze uly üstünlikler dileg edilip, aýat-töwir okaldy.
Soňra Döwlet Baştutany sadaka berilýän jaýa bardy. Bu ýerde türkmen Lideri Türkmenistan, onuň gadymy taryhy, özboluşly däpleri we häzirki güni barada döreden ajaýyp eserlerinden düşen galam haklarynyň hasabyna sadaka berdi.
Soňra Türkmenistanyň müftüsi tebärek çykdy. Şondan soňra nahar çekildi. Nahardan soň, aýat-töwir okaldy we hormatly Prezidentimiziň mukaddes Oraza aýynyň birinji gününde beren agzaçar sadakasynyň Beýik Biribaryň dergähinde kabul bolmagy dileg edildi.
Bu metjit 2018-nji ýylyň sentýabrynda açyldy. Umumy meýdany 13 müň inedördül metrden gowrak bolan metjidiň binagärlik keşbi milli binagärligiň iň gowy däplerine hem-de bu ulgamda häzirki zaman ýörelgelerine laýyk gelýär.