Türkmenistanyň Prezidenti sanly wideoaragatnaşyk arkaly iş maslahatyny geçirdi

Prezident Gurbanguly Berdimuhamedowyň 20-nji aprelde Aşgabat şäheriniň hem-de welaýatlaryň häkimleriniň gatnaşmagynda sanly wideoaragatnaşyk arkaly geçiren iş maslahatynda ýurdumyzda ýaýbaňlandarylan giň möçberli özgertmeler maksatnamasynyň ýerine ýetirilişi, möwsümleýin oba hojalyk işleriniň barşy hem-de öňde boljak baýramçylyk çärelerine görülýän taýýarlyk meselelerine garaldy.
Maslahatyň başynda ilki bilen Aşgabat şäheriniň häkimi paýtagtymyzda alnyp barylýan işleriň ýagdaýy, şäher düzümini mundan beýläk-de ösdürmek we döwrebaplaşdyrmak boýunça durmuşa geçirilýän çäreler barada hasabat berdi.
Türkmenistanyň hemişelik bitaraplygynyň şanly 25 ýyllygyna ulanmaga berilmegi meýilleşdirilen dürli maksatly gurluşyk binalarynda alnyp barylýan işler, Türkmen bedewiniň milli baýramynyň şanyna guralýan çäreler hem-de tomusky dynç alyş möwsümine görülýän taýýarlyk işleri barada habar berildi.
Soňra sanly wideoaragatnaşyk arkaly geçirilýän iş maslahaty welaýatlaryň hakimleriniň hasabatlary bilen dowam etdi. Hususan-da, sebitlerde alnyp barylýan oba hojalyk işleriniň ýagdaýy, gowaça ekişiniň depginini güýçlendirmek, güýzlük ak ekinlere degişli derejede ideg işlerini ýola goýmak ugrunda ýaýbaňlandyrylan işler barada hasabat berildi. Ýeralmanyň, gök we bakja ekinleriniň bol hasylyny ýetişdirmek maksady bilen zerur işler alnyp barylýar.
Prezident Gurbanguly Berdimuhamedow hasabatlary diňläp, ak ekinlere agrotehniki kadalara laýyk derejede ideg edip, bol hasyl ýetişdirmek boýunça zerur çäreleri görmek babatda häkimlere birnäçe anyk tabşyryklary berdi. Ýetişdirilen bugdaý hasylyny öz wagtynda ýygnamak üçin galla oragyna ähli ugurlar boýunça hemmetaraplaýyn taýýarlyk görülmelidir.
Döwlet Baştutany sebitleriň ýaşaýyş-durmuş düzümini kämilleşdirmek meseleleriniň hemişe gözegçilikde saklanylmagynyň wajypdygyny belläp, Oba milli maksatnamasynyň durmuşa geçirilişine, täze desgalaryň gurluşygynda alnyp barylýan işlere gözegçiligi güýçlendirmegi tabşyrdy.
Şeýle hem Gurbanguly Berdimuhamedow dünýäde uly şöhrat gazanan hem-de halkymyzyň milli buýsanjy bolan bedewlerimiziň hormatyna guralýan baýramçylyk dabaralaryny ýokary derejede geçirmek babatda häkime anyk görkezmeleri berdi.