ABŞ Bütindünýä saglygy goraýyş guramasyna töleg geçirmegini bes etdi

Amerikanyň Birleşen Ştatlary Bütindünýä saglygy goraýyş guramasyna (BSGG) töleg geçirmesini togtatdy. Bu barada sişenbe güni ABŞ-nyň Prezidenti Donald Tramp brifingiň dowamynda aýtdy, diýip Trend agentligi TASS-a salgylanyp habar berýär.
«Şu gün men BSGG-niň koronawirusyň ýaýramagy hakynda maglumatlary ýaşyrandygy we ýaramaz dolandyryşy bilen bagly bahalandyrma geçirilýänçä gurama tölegleri saklamak hakynda administrasiýa tabşyryk berdim. Hemmeler nämäniň bolup geçendigini oňat bilýär. Amerikan salgyt töleýjileri BSGG-niň býujetine her ýylda 400-500 mln dollar töleýärdi. Deňeşdirip görmek üçin Hytaý 40 mln dollar töleýärdi» - diýip Tramp aýtdy.
«Guramanyň esasy hemaýatkäri hökmünde ABŞ BSGG-niň ähli jogapkärçiligi doly çekmegini talap edýär. Hytaý we beýleki döwletler bilen howa gatnawyny gadagan etmek boýunça ABŞ-nyň kararynyň tankytlanylmagy iň howply çözgütleriň biri boldy. Bagtymyza, men olaryň maslahatlaryny diňlemän, howa gatnawlaryny togtatdyk we netijede müňlerçe adamyň janyny halas etdik <...> BSGG-niň maslahatlaryna eýerip, serhetlerini açyk goýan beýleki ýurtlara, aýratyn hem, Ýewropa ýurtlaryna seredip görüň».