Apple bilen Google COVID-19-a garşy göreşde hyzmatdaş boldular

Ýaňy-ýakynda Apple bilen Google koronawirus ýaýrawy we şeýle keseller bilen göreşmek üçin bar bolan programma we apparat enjamlarynyň hem-de tehnologiýalarynyň esasynda umumy kömekçi platformasyny işläp taýýarlamak boýunça global taslamada hyzmatdaş bolandyklaryny habar berdiler, bu barada m.habr.com belleýär.
Kompaniýanyň hyzmatdaşlykly taslamasy iOS we Android gurluşlaryny ulanyjylar üçin koronawirus ýaýrawyny meýletin yzarlamanyň bilelikdäki goragly mobil sistemasyny işläp taýýarlamagy göz öňünde tutýar. Ýagny, dürli kompaniýalaryň smartfonlaryny we gajetlerini ulanyjylar olaryň koronawirus barlygy mümkin bolan adam bilen gatnaşykda bolandyklary barada öňünden habarly bolar ýaly.
Bu waka barada Google we Apple ýolbaşçylygy Twitterde resmi taýdan habar berdiler:
“Biziň ählimiz, Apple-iň we Google-iň işgärleri, iň bir zerur bolan dünýä meseleleriniň birini çözmek boýunça bilelikde işlemek üçin mundan öň şular ýaly möhüm pursat hiç haçan bolmadymyka diýip pikir edýäris. Işläp düzüjiler, hökümetler we saglygy goraýşyň jemgyýetçilik guramalary bilen özara gatnaşygyň we ýakyn hyzmatdaşlygyň netijesinde biz ýurtlara COVID-19 ýaýrawyny tutuş dünýä boýunça gowşatmaga kömek etmek we adaty durmuşa dolanyşygy tizleşdirmek üçin tehnologiýanyň mümkinçiliklerinden peýdalanmaklyga umyt bildirýäris – diýip kompaniýalar belleýär.
Ulanyjylaryň taslamanyň mobil programmasyny ulanjak gurluşlary Bluetooth arkaly belli bir maglumatlary alyş-çalyş ederler. Taslamanyň merkezleşdirilen sistemasy sistema näbelli bolan ulanyjylaryň arasyndaky kontaktly aragatnaşyklar baradaky fakty bellär, aragatnaşygyň bolýan ýerini, onuň wagtyny we beýleki şertleri hem-de parametrleri seljerer, bu aragatnaşygyň näbelli maglumatlaryny umumy bazada saklar.
Ulanyjylaryň biri koronawirus bilen keselländigini bilen ýagdaýynda, saglygy goraýyş organlarynyň barlanan informasion sistemalary tarapyndan bu informasiýa umumy baza girizilenden soň, onuň bilen öň gatnaşyga giren beýleki ulanyjylar olaryň koronawirus barlygy mümkin bolan adam bilen aragatnaşykda bolandyklary barada duýduryş alarlar, netijede olara barlagdan geçmek teklip ediler ýa-da anyk medisina görkezmeleri berler.
Bu sistemanyň ulanylmagy ulanyjylaryň howpsuzlyk derejesini pese düşürmez we olaryň şahsy durmuşyna goşulmazlyk boýunça hukuklarynyň bozulmagyna getirmez. Apple bilen Google 2020-nji ýylyň maýynda iOS we Android gurluşlarynyň arasynda medisina programmalarynyň sazlaşygyny üpjün ediji abzallary çykarjakdyklaryny habar etdiler.