Türkmenistan türk kompaniýasyndan 67 mln ýewrolyk kazyýet dawasynda üstün çykdy

Maýa goýum dawalaryny kadalaşdyrmak boýunça halkara merkeziniň tribunalynyň 6-njy aprelde kabul eden çözgüdine laýyklykda, «Lotus Holding» türk kompaniýasynyň 2017-nji ýylda Türkmenistanyň hökümetine garşy açan 67 mln ýewrolyk kazyýet dawasy türkmen tarapynyň peýdasyna kanagatlandyryldy. Bu barada sngtoday saýty «Global Arbitration Review» žurnalyna salgylanyp habar berýär.
Kazyýet dawasy taraplaryň arasynda energetika ulgamynda birnäçe ylalaşyklaryň bozulmagy bilen bagly türk kompaniýasy tarapyndan arz edilip açylypdy. Arzada bellenilişine görä, «Lotus Enerji» türk kompaniýasy tarapyndan Türkmenistanyň çäginde işler ýerine ýetirilip tamamlanandan soňra, döwlet «bikanun esasda dürli taslamalara eýelik edipdir we degişli töleg geçmändir». Bu ýerde umumy kuwwatlylygy 254 megawatta deň bolan iki sany elektrik bekedine goýlan maýa goýum göz öňünde tutulýar. Şeýle hem arzanyň ýene-de bir punktynda nebiti gaýtadan işleýän toplum bilen şertnamanyň bikanun esasda bozulmagy görkezilýär. Arzada beýan edilişine görä, Türkmenistan tarapyndan bu düzgün bozmalar kompaniýanyň bankrot ýagdaýa düşmegine getiripdir.
Öz gezeginde, Türkmenistanyň hökümeti görkezilen närazyçylyklaryň hukuk taýdan esassyzlygyny we hökümet tarapyndan edilen ähli hereketleriň türk kompaniýasynyň dahyly bolmadyk şertnamalara esaslanandygyny aýdyp, arzaçy tarapyndan berlen talaplardan boýun gaçyrýandygy hakynda towakganamasyny berdi.
Çözlüşmeleriň netijesinde, kompaniýa tarapyndan anyk delilleriň we resmi kagyzlaryň ýokdugy sebäpli arbitraž kazyýet Türkmenistanyň peýdasyna çözgüt kabul etdi.
«Lotus Holding» kazyýet çykdajylary üçin Türkmenistana 1 million dollar töweregi tölemäge borçly edildi.