Bloomberg koronawirusyň dünýä ykdysadyýetine ýetirjek zyýanyny $5 trln diýip bahalandyrdy

Bloomberg kompaniýasynyň analitikleri koronawirus ýaýrawy sebäpli dünýä ykdysadyýeti üçin umumy zyýanyň iki ýylyň içinde 5 trillion dollara barabar boljakdygyny hasapladylar diýip, ren.tv saýty habar berýär. Bu pul möçberi Ýaponiýanyň hyzmatlarynyň we haryt önümçiliginiň ýyllyk göwrüminden hem ýokary geçýär.
Häzirki wagtda wirus sebäpli hökümetleriň bizneslere işlerini bes etmegi, adamlara bolsa öýde oturmagy tabşyrandyklary sebäpli, dünýäniň “1930-njy ýyllardan soňky asuda durmuşda iň güýçli resessiýa ýagdaýyna” girişýändigi bellenilip geçilýär.
Şonuň bilen birlikde ekspertler ykdysady taýdan beýle pese düşmäniň dowamly bolmajakdygyny belleýärler, ýöne her niçik-de bolsa, “ýitirilen zadyň öwezini dolmak” üçin wagt gerek bolar. Hiç bolmanda 2022-nji ýyla çenli dünýäniň JIÖ-i çökgünlikden öňki derejä dolanmaz diýip ekspertler hasaplaýarlar. Ýöne 2021-nji ýylyň üçünji çärýeginde has ösen ýurtlaryň JIÖ-iniň çökgünlikden öňki derejä gelmegi ahmal.
Dünýä söwdasynyň göwrüminiň COVID-19 koronawirus pandemiýasy zerarly pese düşmegi şu ýylda 30%-e barabar bolar diýip Bütindünýä söwda guramasy habar berýär (BSG). “Dünýä söwdasynyň 2020-nji ýylda 13-32% peselmegine garaşylýar, sebäbi COVID-19 pandemiýasy kadaly ykdysady işjeňlige we tutuş dünýädäki ýaşaýşa zyýan ýetirýär” – diýip, BSG-da bellenilýär.
Häzirki wagtda tutuş dünýä boýunça koronawirus 1,5 mln adamda ýüze çykaryldy, olardan 88 müňüsi aradan çykdy, 328 661-si gutuldy.