Korporatiw ýollanmasynda Tesla koronawirus sebäpli önümçiligiň peselmegi bilen baglylykda ähli işgärleriniň aýlyklaryny azaltmaly bolýandygyny hem-de uzak işläp bilmeýänleri we möhüm wezipäni eýelemeýänleri tölegsiz rugsada ibermeli bolýandygyny habar berdi, bu barada CNBC telekanalyna salgylanmak bilen dev.by habar berýär.
Kompaniýa bu çäreleri 13-nji aprelden iş ýüzüne geçirip başlar. Şu ýylyň ikinji çärýeginiň ahyryna çenli wise-prezident derejesindäki Tesla-nyň menejmenti we ondan ýokarkylar ABŞ-da 30% az aýlyk alarlar, bölümleriň müdirleriniň we ondan ýokarkylaryň aýlyklary 20% azalar, galan ähli işgärleriňki 10% azaldylar. Şeýle kemeltmeler daşary ýurt işgärlerine-de degişli edilip bilner.
Mundan başga-da, kompaniýa sagatlaýyn tölenýän zähmet haklarynyň möçberini hem, şeýle-de işgärlere aksiýanyň berilmegini hem wagtlaýyn bes eder.
Tesla ABŞ-daky kärhanalarynda önümçiligi 4-nji maýa çenli doly derejede dikeltmegi meýilleşdirýär.
San-Fransiskonyň çäklerine karantin girizilenden soň, Tesla 23-nji martdan özüniň Frimontdäki esasy kärhanasyny wagtlaýyn ýapdy. Ol Nýu-Ýorkdaky Buffalo kärhanasynda hem gün batareýleriniň önümçiligini doly saklady. Newadadaky ägirt fabrika bolsa koronawirus ýagdaýyna garamazdan, heniz işini dowam etdirýär.
Tesla aýlyklary kemeldýär, işgärleriň bir bölegini bolsa tölegsiz rugsada iberýär
- 10.04.2020 23:35
- 3.1k+
