Türkmenistanda COVID-19 ýok — Bütindünýä saglygy goraýyş guramasy

Bütindünýä saglygy goraýyş guramasynyň Ýewropa sebit edarasynyň Täjigistandaky hemişelik wekilliginiň ýolbaşçysy Galina Perfilýewa «Tajikistan» teleýaýlymyna beren interwýusynda sebitiň diňe iki ýurdunda — Türkmenistanda we Täjigistanda COVID-19 koronawirus ýokanjynyň ýeke ýagdaýynyň hem hasaba alynmandygyny aýtdy. Bu barada Arzuw News habar berýär.
Şeýle hem bilermen elleriňi dogry hem tämiz ýuwmagyň, şahsy arassaçylyk düzgünlerini berjaý etmegiň we dogry iýmitlenmegiň möhümligi dogrusynda öňüni alyş çäreleri barada habar berdi.
Häzirki wagta çenli, Türkmenistanda COVID-19 epidemiýasynyň öňüni almak boýunça zerur hem möhüm çäreleri görüldi. Öz wagtynda görlen çäreleriň netijesinde, Hytaýda koronawirusyň ýaýrandygy barada ýurdumyza habar gelip gowşan dessine, bu ýokanjyň getirilmeginiň we ýaýramagynyň öňüniň alynmagy üpjün edildi. Sebäbi gyzgynlyk ölçeýji enjamlaryň ulanylmagy bilen, döwlet serhedinde arassaçylyk-karantin gözegçiligi güýçlendirildi.
Hytaý bilen, soňra bolsa bu ugurda amatsyz ýagdaý ýüze çykan beýleki ýurtlar bilen howa gatnawy çäklendirildi. Daşary ýurtlardan talyplarymyz we raýatlarymyz getirildi.
Beýleki döwletlerden ýurdumyza dolanyp gelen we olar bilen gatnaşykda bolan adamlara lukmançylyk taýdan gözegçilik ýola goýuldy. Şeýle hem ähli daşary ýurt raýatlarynyň ýurdumyza gelmegini wagtlaýyn duruzmak barada karar kabul edildi.