Türkmenistan BMG bilen bilelikde COVID-19-yň ýaýramagynyň öňüni almagyň üstünde işleýär

Türkmenistanyň hökümeti koronawirus ýokanjynyň ýurduň çägine aralaşmagynyň öňüni almak boýunça çäreleri güýçlendirýär. Şunuň çäklerinde 31-nji martda Türkmenistanyň Saglygy goraýyş we derman senagaty ministrliginiň wekilleri BMG-niň wekilleri bilen duşuşdylar. Duşuşygyň barşynda COVID-19-yň Türkmenistanyň çägine aralaşmagynyň öňüni almak boýunça milli meýilnamany işläp düzmek maslahatlaşyldy. Bu barada SNG.Today saýty Birleşen Milletler Guramasynyň Türkmenistandaky saýtyna salgylanyp habar berýär.
BMG-niň Türkmenistandaky hemişelik utgaşdyryjysy Ýelena Panowanyň belleýşi ýaly, Bu meýilnamanyň esasy maksady bu ýokanç keseliň aralaşmagynyň öňüni we göreşmek ulgamynda ýurduň zerurlyklaryny kesgitlemekden ybaratdyr.
Bu meýilnama «janly» bolup, ol zerurlyk ýüze çykanda yzygiderli täzelenip durar. Bu meýilnama adatdan daşary ýagdaýlara garşy göreş maksatlaryny, strategiýalaryny we hereketlerini kesgitleýär, şeýle-de adatdan daşary ýagdaýlara garşy hereketleriň utgaşdyrylmagyny we netijeliligini üpjün edýän çäreleriň düzümini hem-de jogapkärçiligiň paýlanyşyny görkezýär.
Türkmenistanyň Saglygy goraýyş we derman senagaty ministrliginiň maglumatlaryna görä, häzirki wagtda ýurtda koronawirus ýokanjynyň ýeke ýagdaýy hem hasaba alynmady. Türkmenistan COVID-19 ýokanjynyň ýurda aralaşmagynyň öňüni almak boýunça toplumlaýyn çäreleri yzygiderli durmuşa geçirýär. Iri ilatly nokatlaryň töwereginde, şol sanda Aşgabadyň töwereginde goşmaça gözegçilik nokatlary döredildi. Iri şäherlere we ilatly nokatlara girmezden öň infragyzyl termometrler arkaly sürüjileriň we ýolagçylaryň bedeniniň temperaturasy barlanylýar. Bu howpsuzlyk çäresi içerki howa gatnawlarynda gatnaýan ýolagçylara hem degişlidir. Galyberse-de, Saglygy goraýyş we derman senagaty ministrligi koronawirusy anyklamak üçin Rospotrebnadzordan ýeterlik mukdarda test-sistemalaryny aldy.