Türkmenistanda okuwçylaryň dynç alyş möwsümi 6-njy aprele çenli uzaldyldy

Türkmenistanyň umumy orta bilim berýän ähli mekdeplerinde ýazky dynç alyş möwsümi 6-njy aprele çenli uzaldyldy. Degişli Buýruga Türkmenistanyň Bilim ministrligi gol çekdi. Öňüni alyş arassaçylyk çäreleri hökmünde bu resminama Bütindünýä saglygy goraýyş guramasy tarapyndan koronawirus pandemiýasynyň yglan edilmegi bilen baglanyşykly ýokanç keselleriň ýaýramagynyň öňüni almaklyga gönükdirilendir. Bu barada Turkmenportal agentligi Aşgabadyň Baş bilim müdirligine salgylanyp habar berýär.
COVID-19 pandemiýasynyň ilkinji ýagdaýlary geçen ýylyň ahyrynda Hytaýyň Uhan şäherinde hasaba alnyp, häzir bu kesel 177 döwletde ýüze çykaryldy.
Türkmenistanyň hökümeti tarapyndan wirusyň ýurduň çägine aralaşmagynyň öňüni almak üçin birnäçe howpsuzlyk çäreleri görüldi. Iri ilatly nokatlaryň töwereginde, şol sanda Aşgabadyň töwereginde goşmaça gözegçilik nokatlary döredildi. Iri şäherlere we ilatly nokatlara girmezden öň infragyzyl termometrler arkaly sürüjileriň we ýolagçylaryň bedeniniň temperaturasy barlanylýar. Bu howpsuzlyk çäresi içerki howa gatnawlarynda gatnaýan ýolagçylara hem degişlidir.
Koronawirusyň ýaýramagynyň öňüni almak maksady bilen 2020-nji ýylyň 20-nji martyndan 20-nji apreli aralygynda daşary ýurt raýatlaryna we raýatlygy bolmadyk adamlara Türkmenistanyň döwlet serhedinden geçmeklik çäklendirildi.
Belläp geçsek, Türkmenistanyň Saglygy goraýyş we derman senagaty ministrliginiň berýän maglumatlaryna görä, ýurtda koronawirus ýokanjynyň ýeke ýagdaýy hem hasaba alynmady.