Rus awiakompaniýasynyň çarter uçary daşary ýurt raýatlary bilen Türkmenabatdan Moskwa uçdy

Russiýanyň S7 awiakompaniýasynyň çarter gatnawy Russiýanyň, Ýaponiýanyň we Belarusyň raýatlary bilen şenbe güni Türkmenabat şäherinden Moskwa uçdy. Bu barada Russiýanyň Türkmenistandaky ilçihanasyna salgylanyp, Ria Nowosti agentligi habar berýär.
Türkmenistan bilen Russiýa Federasiýasynyň arasyndaky howa gatnawlary koronawirus bilen bagly ýagdaýlar sebäpli saklanyldy.
Habarda bellenilişi ýaly, «28-nji martda Russiýa Federasiýasynyň ilçihanasynyň ýardam etmeginde S7 awiakompaniýasynyň uçary Türkmenabadyň halkara howa menzilinden Moskwa uçdy. Howa gämisinde Russiýanyň, Ýaponiýanyň we Belarus döwletiniň Türkmenistanyň çäginde wagtlaýyn bolan we uçmak boýunça ýardam sorap ýüz tutan 81 sany raýat bar».
Ria Nowosti agentliginiň habar berşi ýaly, «Türkmenistanyň hökümetiniň berýän maglumatlaryna laýyklykda, ýurtda koronawirus ýokanjynyň ýeke ýagdaýy hem hasaba alynmady».