“Real” COVID-19 bilen göreşmek üçin “Santýago Bernabeuy” döwlete berdi

“Real” pandemiýa bilen göreşmek üçin mümkinçiligine görä kömek edýär, bu barada klubyň resmi saýtyna salgylanmak bilen merengues.ru habar berýär.
Resmi saýtyň habar bermegine görä, Madridiň “Realynyň” ýolbaşçylygy “Santýago Bernabeu” stadionyny Ýokary sport geňeşiniň (CSD) ygtyýarlygyna berdi.
Olaryň hususy stadiony COVID-19 koronawirusy bilen göreşde kömek kordinasiýasy üçin toplumlaýyn merkez bolup hyzmat eder. “Bernabeuda” gerekli dermanlar, gigiýena serişdeleri we ýöriteleşdirilen enjamlar saklanylar.
Madridiň “Realynyň” Ýokary sport geňeşi bilen ýakyn hyzmatdaşlygynyň esasynda, “Santýago Bernabeu” stadiony gerekli serişdeleriň, şol sanda, pandemiýa bilen göreşde kömek edip biljek gigiýena serişdeleriniň saklanylýan ýeri bolar. Hökümetiň ýolbaşçylygy astynda Ispaniýanyň saglygy goraýyş edaralaryndan kabul edilen ähli serişdeler häzirki adatdan daşary ýagdaýda örän möhüm bolan bu gorlaryň ýokary derejede we netijeli ulanylyşyny üpjün eder ýaly “Bernabeuda” saklanylar” – diýlip CSD-niň bildirişinde aýdylýar.
Mundan başga-da, klubyň ýolbaşçylygy maliýe ýa-da başga bir tarapdan kömek etmekçi bolýan dürli guramalar üçin Madridiň “Realynyň” olary saglygy goraýyş ministrligine geçiriji köpri bolup çykyş etmegi boýunça teklibini öňe sürdi. Bu gözegçilik we aragatnaşyk mehanizmi Ispaniýa hökümeti tarapyndan ulanylýan we gözegçilikde saklanylýan mehanizmiň üstüni ýetirer.
Ýatladyp geçsek, öň “Real” koronawirus bilen göreşmek üçin maliýe taýdan uly goldaw berdi we medisina tehnikalarynyň uly möçberi bilen hem özüniň kömegini ýetirdi. “Şa klubynyň” futbolçylary bolsa, mätäçlik çekýänlere kömek bermek üçin birnäçe gazna döretdiler.