Hytaýda koronawirus bilen kesellänleriň 83%-i sagaldy

Hytaýda koronawirus bilen kesellänleriň sany gün-günden azalýar. Kesellänleriň 82,7%-i hassahanadan çykaryldy, bu kesel zerarly aradan çykanlaryň sany häzirki wagtda HHR-de 3,95%-e ýetdi. Muňa HHR-iň saglygy goraýyş meseleleri boýunça döwlet geňeşiniň maglumatlary şaýatlyk edýär. Bu barada Trend agentligi Ria Nowosti agentligine salgylanyp habar berýär.
Soňky maglumatlara görä, Hytaýyň çäklerinde koronawirus bilen kesellänleriň sany 80 844 adama ýetdi, şolardan 66 991 adam bejerildi we hassahanadan çykaryldy. Bu bolsa kesellänleriň umumy sanyndan 82,7%-e barabardyr. Epidemiýa başlan wagtyndan bäri, tutuş Hubeý welaýatyny hasaba almazdan, Hytaý boýunça ýokanç kesel bilen kesellänleriň sany 13 050 adama ýetdi, olardan 114-si aradan çykdy (0,87%). Epidemiýanyň dörän ýeri bolan Hubeý welaýatynda 67 794 adamda bu kesel ýüze çykaryldy, şolardan 3085 adam aradan çykdy (4,5%).
Soňky wagtlarda Hytaýda epidemiologik ýagdaý kadalaşýar. Soňky günlerde tutuş ýurt boýunça bary-ýogy 20 adamda bu kesel ýüze çykaryldy, şolardan 16-sy Hytaýa daşary ýurtlardan gelenlerde ýüze çykaryldy we dördüsi Hubeý welaýatynda tapyldy.