Türkiýe täze görnüşli koronawirusyň ýaýramagyna garşy göreş çäreleriniň çäginde 14 sany döwletiň raýatlaryna ýurduna girmegi gadagan etdi. Bu barada ORIENT agentligi «Anadoly» türk habarlar agentligine salgylanyp habar berýär.
Öň, Türkiýe 3-nji fewraldan başlap, Hytaý bilen howa gatnawyny kesdi, 23-nji fewraldan – Eýran, 29-njy fewraldan bolsa – Yrak, Günorta Koreýa we Italiýa.
14-nji martda Türkiýe Germaniýadan, Ispaniýadan, Norwegiýadan, Fransiýadan, Awstriýadan, Daniýadan, Şwesiýadan, Belgiýadan we Niderlandlardan gelýän ýolagçylaryň ählisine ýurduň serhedindäki barlag-goýberiş nokatlaryndan geçmegi gadagan etdi.
Degişli görkezmä 13-nji martda Türkiýäniň içer işler ministri Süleýman Soýlu saglygy goraýyş ministri Fahrettin Goja, adalat ministri Abdulhamit Gülen we ulag we infrastruktura ministri Mehmet Jahit Turhan bilen geçiren bilelikdäki mejlisiniň netijeleri boýunça gol çekdi.
Gadaganlyk 2020-nji ýylyň 17-nji apreline çenli hereket eder. Bellenilip geçilen döwletleriň ýaşaýjylaryndan başga-da, soňky 14 günüň dowamynda sanalyp geçilen döwletlerde bolan üçünji döwletleriň raýatlaryna hem gadaganlyk degişlidir.
Resminama laýyklykda, Türkiýeden şol döwletlere gitmeklik hem wagtlaýyn saklanylýar. Şol bir wagtda Türkiýeden Germaniýanyň, Ispaniýanyň, Fransiýanyň, Awstriýanyň, Norwegiýanyň, Daniýanyň, Şwesiýanyň, Belgiýanyň we Niderlandlaryň raýatlarynyň gitmegine gadaganlyk degişli däldir.
Daşary ýurt gämileriniň ählisi Türkiýäniň portlaryna girmezden ozal gäminiň soňky baran 10 sany portunyň sanawyny bermelidir. Eger-de gämi Hytaýda, Eýranda, Italiýada, Germaniýada, Şwesiýada, Niderlandlarda, Fransiýada, Ispaniýada, Daniýada, Norwegiýada, Belgiýada, Tailandda, Ýaponiýada, Günorta Koreýada, Gonkongda we Singapurda bolan bolsa, ýa-da şol döwletleriň raýatlaryny soňky 14 günüň dowamynda gatnadan bolsa onda zerur bolan çäreler görler.
Türkiýe 14 döwletiň raýatlaryna ýurda girmegi gadagan etdi
- 15.03.2020 09:12
- 15k+