UEFA koronawirus zerarly Ýewro-2020-ni yza süýşürip ýa-da ýatyryp biler

UEFA-nyň wise-prezidenti Mikele Uwa nähili ýagdaýda Ýewropa-2020 çempionatynyň süýşürilip ýa-da ýatyrylyp bilinjekdigini aýtdy. Ýöne onuň wagt boýunça ýa-da geografik taýdan süýşüriljekdigi barada heniz maglumat ýok.
Ýewropanyň çempionaty 2020-nji ýylda 12-nji iýundan 12-nji iýul aralygynda geçer. Ýatladyp geçsek, turniriň bu gezek bir-iki hojaýyny bolmaz, taryhda ilkinji gezek turniriň final böleginiň oýunlary 11 döwletiň 12 şäherinde geçiriler – Amsterdamda, Bakuda, Bilbaoda, Budapeştde, Buharestde, Glazgoda, Dublinde, Kopengagende, Londonda, Mýunhende, Rimde we Sankt-Peterburgda.
“Häzirki wagtda biz ýagdaýlaryň ösüşine gözegçilik edýäris. Futbol ýurtda ýagdaýa görä gurnalmaly. Biz turniri saklamazlyga çalyşýarys. Ýagdaýlar erbetleşse, ýaryşlar hem bes ediler” – diýip, Rai Radio 1 Sport-a salgylanmak bilen rsport.ria.ru Uwanyň sözlerini getirýär.
Ýewro-2020-niň ýurt-hojaýynlarynyň biri Russiýa bolar. Turniriň dört duşuşygy Sankt-Peterburgda geçiriler. Krestow adasyndaky meýdança toparlaýyn raundyň üç oýnuny we dörtden bir finaly kabul eder.
Uwanyň sözleri Ýewropanyň esasy futbol guramasynda çempionatyň ýatyrylmagy bilen bagly soragyň maslahatlaşyljakdygyny aňladýar. Ýogsa-da, Ýewro-2020 – bu ýygyndy toparlar üçin tomusda geçirilmän bilinjek ýeke-täk uly futbol turniri däl. Geljek üç aýyň içinde Olimpiada-2020-niň hem ykbaly çözülmeli.