Xiaomi real wagtda maglumatlary ýygnamak üçin datçikli “akylly” gorag maskalaryny patentledi

itc.ua saýtynyň habar bermegine görä, Xiaomi kompaniýasy ABŞ-nyň Haryt bellikleri we patent boýunça edarasynda patenti bellige aldyrdy. Onda “akylly maska” atly enjam barada beýan edilýär.
Patente salgylansak, maska prosessory sensordan gelýän maglumatlary gaýtadan işleýän hasaplaýjy blok bilen üpjün edilen. Ýygnalan maglumatlar saklama modulynyň kömegi bilen maskada saklanylyp galar we olar aragatnaşyk moduly arkaly beýleki gurluşlara hem geçirilip bilner. Ähli sensorlaryň we modullaryň iş ukyplylygyny üpjün etmek üçin maska standart howa süzgüjini iýmitlendirýän batareýa eýe.
Sensor barada aýdylanda, maska akselerometr we giroskop (maska ulanyjynyň hereketdedigini ýa-da hereketsizlikdedigini kesgitlemäge kömek edýär) bilen, şeýle-de dakyp gezmäniň umumy wagty, hapany siňdirme, dem alyş göwrümi, dem alşy görkezijiler we ş.m ýaly maglumatlary bellige alýan datçikleriň birnäçesi bilen üpjün edilýär.
Aragatnaşyk modulynyň kömegi bilen maska mobil programmasyna birikdirilip bilinýär, şonda ähli maglumatlar real wagt režiminde görkezilýär, şeýle-de, ulanyjynyň şäherindäki howa we howanyň hili baradaky informasiýalar hem hödürlenilýär. “Akylly” maska dem alşyň potensial bozulmak ýagdaýyny hem ýüze çykaryp, dem alşyň sagdyn usulyny maslahat bermäge-de ukyply bolup biler.
Ýöne munuň diňe patentdigini belläp geçmeli. Heniz Xiaomi kompaniýasy şeýle “akylly” maskalary bazara çykarmagy meýilleşdirýärmi ýa-da ýokmy, bu barada maglumat ýok.