Ýaponiýada 2020-nji ýylyň tomusky Olimpiadasynyň şygary saýlanyldy

2020-nji ýylyň Olimpiýa we Paralimpiýa oýunlarynyň guramaçylyk komiteti Tokioda geçiriljek ýaryşlaryň şygaryny saýlady. Bu barada guramaçylyk komitetiniň duşenbe güni ýaýradylan habaryna salgylanmak bilen TASS habar berýär.
“United by emotion” (“Bir duýgy arkaly birleşen”) jümlesi Oýunlaryň resmi şygary boldy. “Bahym dünýäniň ähli ýerindäki adamlaryň ýaryşlar bilen bagly öz duýgularyny paýlaşmak isleýän wagty geler. Şonuň üçin “Tokio-2020-niň” guramaçylyk komiteti Oýunlary üstünlikli geçirer ýaly bu şygary ulanmak kararyna geldi” – diýip, guramaçylar belleýär.
Ýapon paýtagtynda tomusky Olimpiada sportsmenlere we myhmanlara ýaryşmaga, dürli ýurtdan bolan adamlaryň köpüsine bolsa, adamlary biri-birinden aýrylyşdyrma derek, birikdirýän zatlaryň köpdügine düşünmäge mümkinçilik berer diýip hasaplaýarlar.
Miraýtowa we Someýti maskotlary ýaryşlaryň resmi tumary boldy. Daşky görnüşi boýunça olar anime-haýwanjyklaryny janlandyrýarlar. Gök-ak Olimpiýa tumary Miraýtowa we Paralimpiadanyň ak-gyzyl nyşany Someýti Ýaponiýanyň mekdepleriniň okuwçylarynyň ses bermekleri netijesinde saýlanyldy.
Miraýtowanyň ady “geljek” we “bakylyk” ieroglifleriniň birleşmeginden emele gelen. Adalatlylygyň ýiti duýgusy we sporta bolan hyjuw onuň esasy häsiýetli tarapydyr.
Paralimpiadanyň tumarynyň ady Someýti gülleýän sakuranyň bir görnüşini aňladýar. Onuň ady iňlisçe “So Mighty” (“şeýle bir güýçli”) bilen sesdeş. Someýti fiziki we ruhy taýdan örän güýçli, bu bolsa ony ähli kynçylyklary ýeňip geçýän we mümkinçiligiň çägini giňeldýän paralimpiadaçylar bilen ýakynlaşdyrýar.
Tokioda Olimpiada iýul aýynyň 24-inden awgust aýynyň 9-y aralygynda geçiriler, Paralimpiada awgust aýynyň 25-inden sentýabr aýynyň 6-syna çenli dowam eder.