“Formula-1 2020” çempionatynyň tapgyry koronawirus epidemiýasy zerarly süýşürildi, bu barada Halkara awtomobil federasiýasynyň resmi saýtynda habar berilýär.
Hytaýyň gran-prisi Şanhaýda 17-19-njy aprelde geçirilmelidi. Bellenilip geçilişi ýaly, ony süýşürmek karary ýaryşy gurnaýjylaryň haýyşy boýunça “Formula-1-iň” ýolbaşçylary bilen bilelikde FIA tarapyndan kabul edildi.
“Ýaýramagyny dowam etdirýän täze koronawirus we HHR-nyň awto we motosport federasiýasy bilen dowamly jedel zerarly Hytaýyň Gran-prisiniň promouteri 2020-nji ýylda ýaryşy soňa süýşürmek haýyşy bilen resmi taýdan ýüz tutdy. FIA hem “Formula-1” bilen bilelikde guramaçydan gelen bu resmi haýyşy kabul etmek hem-de gran-prini süýşürmek kararyna geldi” – diýip, FIA-nyň metbugat gullugynyň relizinde bellenilýär.
“FIA we “Formula-1” ýaryşy ösdürmek boýunça ýagdaýlara gözegçilik edip, toparlar bilen, ýaryşyň promouteri we ýerli hökümet bilen hyzmatdaşlyk işlerini alyp barmagy dowam etdirýärler. Ähli taraplara-da eger ýagdaý gowulaşsa, Hytaýyň Gran-prisini ýylyň dowamynda başga senede geçirmek mümkinçiligini öwrenmek üçin belli bir wagt gerek” – diýlip relizde aýdylýar.
Ýatladyp geçsek, 2019-nCoV koronawirus arkaly ýüze çykan pnewmoniýa ýaýrawy Hytaýyň Uhan şäherinde 2019-njy ýylyň dekabr aýynyň ahyrlarynda başlandy.
Koronawirus zerarly “Formula-1-iň” Hytaýdaky tapgyry süýşürildi
- 17.02.2020 21:42
- 2.1k+
