Lionel Messiniň täjirçilik saparynyň çäklerinde Hindistanyň Kalkutta şäherindäki Vivekananda Yuvabharati Salt Lake stadionyna barmagynyň dowamlylygynyň gysga wagtlyk bolmagy, onlarça müň futbol janköýerleriniň tertipsizlik döretmegine getirdi. Bu barada India Today neşiri habar berdi.
Janköýerleriň aglabasy petek üçin ep-esli pul sarp edipdiler. Iň arzan bilet 5 müň hindi rupiýasyna barabar bolup, bu, takmynan, 55 dollara deň. Iň gymmat bilet 280 dollara ýetýär. Janköýerler çäräniň guramaçylygynyň pes bolmagyna nägilelik bildirdiler.
Lionel Messi meýdançada bary-ýogy 10 minutlyk peýda boldy we onuň daş-töweregini şol bada syýasatçylar, döwlet wekilleri, meşhur şahsyýetler, olaryň maşgala agzalary we žurnalistler gurşap aldy. Adamlaryň üýşmegi sebäpli howpsuzlyk gullugy meýilleşdirilen meýdança boýunça hormat aýlawyny ýatyrmaga mejbur boldy, bu bolsa Messiniň janköýerler bilen gatnaşygyny ep-esli çäklendirdi. Tiz wagtdan futbolçy güýçli goragyň astynda beýleki ýokary wezipeli adamlar bilen bilelikde stadiony terk etdi.
Messiniň meýdançadan gidendigi belli bolandan soň, münberlerde bidüzgünçilik ýüze çykyp başlady. Öz söýgüli futbolçysyny görmek üçin ençeme aý garaşan janköýerler nägile boldy. Stadiona ir bilen gelen gaharly adamlar meýdança zat zyňyp, mahabat diwarlaryna zyýan ýetirdi. Tertibi ýola goýmak üçin howpsuzlyk gullugynyň işgärleri goşulmaly boldy.
“Düýbünden ýaramaz çäre. Ol bary-ýogy 10 minutlyk geldi. Ony ýokary wezipeli adamlar gabap aldy. Biz hiç zat görmedik. Ol ýekeje gezek hem top depmedi, penalti urmady. Şonça pul, emosiýa we wagt biderek sarp edildi” – diýip, ANI neşiri nägile bolan janköýerleriň sözlerini getirýär.
Wakadan soň Günbatar Bengaliýa ştatynyň baş ministri Mamata Banerji Messiden we janköýerlerden ötünç sorady. Ol çäräniň guramaçylygynda kemçiliklere jogapkär adamlary anyklamak üçin derňew geçirmäge wada berdi.
Messi “ähli döwürleriň iň beýik oýunçysynyň saparynyň” (GOAT) çäklerinde Haýdarabada, Mumbaýa we Delä hem barar. Onuň ýanynda “Inter Maýamidäki” ýoldaşlary Luis Suares we Rodrigo de Paul bar.
Mundan öň Messi Kalkuttada wideoaragatnaşyk arkaly öz şanyna dikilen 21,3 metrlik ýadygärligiň açylyşyna gatnaşdy.
