MWC 2020 sergisi resmi taýdan ýatyryldy

Biz düýn bu sergini ýatyrmak baradaky wariantlaryň gözden geçirilýändigini we onuň anna güni belli boljakdygyny habar beripdik. Indi bolsa 2020-nji ýylyň fewral aýynyň 23-inden 27-si aralygy Barselonada geçirilmeli bolan Bütindünýä Mobil Kongresi (Mobile World Congress ýa-da MWC) COVID-19 koronawirusy zerarly resmi taýdan ýatyryldy. Bu barada GSMA kompaniýasynyň sergini gurnaýjylaryna salgylanmak bilen iphones.ru habar berdi.
“2006-njy ýylda Barselonada geçen ilkinji Mobile World Congress-inden başlap GSMA pudaklaryň wekillerini, ýolbaşçylary, ministrleri, syýasatçylary, operatorlary we liderleri bir uly ekosistema jemläpdi.
Barselonadaky we kabul edýän ýurtdaky raýatlaryň howpsuzlygyny we saglygyny göz öňünde tutup, GSMA MWC Barcelona 2020 sergisini ýatyrdy, sebäbi koronawirus ýaýrawy bilen bagly global alada, syýahatçylar we beýleki hadysalar bilen bagly meseleler bu serginiň geçirilmegine mümkinçilik bermeýär.
Sergini geçirýän şäheriň hökümeti bu gelnen netijä düşünýärler we oňa hormat goýýarlar. GSMA MWC Barcelona 2021 sergisini we beýleki çäreleri gurnamak üçin olar bilen hyzmatdaşlygyny dowam etdirer. Biz Hytaýda we tutuş dünýäde ähli kesellänlere öz gynanjymyzy bildirýäris” – diýip, GSMA-nyň bildirişinde aýdylýar.
Fewral aýyndan başlap ýekeje Kongrese hem gatnaşman durmaýan iri kompaniýalaryň ençemesi bu sergä gatnaşmakdan ýüz öwürdiler. Olaryň ählisi işgärleriniň we olaryň pawilonlaryndaky myhmanlaryň saglygynyň zerurdygyny bellediler.
Barselonanyň meri Ada Kolau şäheriň MWC 2020 sergisini geçirmäge “doly taýýardygyna” žurnalistleri ynandyrdy we adatdan daşary ýagdaýy girizmäge hiç hili deliliň ýokdugyny hem aýtdy.
Şu hepdäniň başynda GSMA gatnaşyjylar Kongresiň geçiriljekdigi, ýöne gatnaşyjylaryň saglygyny howpdan goramak üçin birnäçe goşmaça çäreleriň görüljekdigi barada aýdylýan haty kabul etdiler.
Ýagny, ýaňy-ýakynda Hytaýa baran myhmanlar ýurtdan MWC başlamazyndan iki hepde öň gaýdandyklary barada subutnama getirmelidiler. Sergä gatnaşyjylaryň arasynda kesellileri ýüze çykarmak we olary aýry saklamak üçin temperatura skrinigleri geçirilmelidi.
Muňa garamazdan, gelmekden boýun gaçyran kompaniýalaryň sanyny, şeýle-de, wirusyň gatnaşyjylaryň arasynda ýaýramak ähtimallygyny göz öňünde tutmak bilen GSMA 2020-nji ýylyň Mobile World Congress-ni ýatyrmak kararyna geldi.