Uky wagtynda bägüliň ysy okuw prosesini gowulandyrmaga ýardam edýär

Alymlar uky wagtynda bägüliň ýakymly ysynyň bilim alma prosesini düýpli kämilleşdirýändigini belleýärler. Tejribäniň dowamynda meýletinçileriň umumy bilim derejesi 30% ýokarlandy.
Fraýburg uniwersitetiniň Lukmançylyk merkeziniň hünärmenleri Günorta Germaniýanyň iki sany mekdebiniň 6-njy synplaryndan 54 sany okuwçyny tejribe üçin çagyrdylar. Tejribäniň dowamynda oglanlar we gyzlar bägüliň ysy bilen doldurylan ýerde iňlis dili bilen meşgullandylar. Okuw prosesi hem gündiz, hem gije dowam etdirildi. Barlagçylar howadaky gülüň ýakymly ysynyň okuwçylara oňaýly täsir edýändigini anykladylar. Gündizine ýakymly ysly taýajyklar iş stolunyň üstünde, gijesine uky wagtynda bilim alma prosesiniň dowamynda olar krowatyň ýanyndaky stoluň üstünde goýuldy. Netijede, ýakymly ysyň täsirinde okuwçylaryň sözleri ýadynda gowy saklaýandyklary anyklanyldy. Barlagyň netijeleri «Nature Group Scientific Reports» žurnalynda neşir edildi.
Başga bir eksperimentde okuwçylar bu taýajyklary mekdepde iňlis dili boýunça sözlük testi alnan wagtynda özleriniň ýanynda stoluň üstünde goýdular. Alnan netijeler bir ýa-da birnäçe wagtyň dowamynda ýakymly ysly taýajyklar ulanylman geçirilen barlagyň netijeleri bilen deňeşdirildi.
Netijä laýyklykda, okuwçylar hem bilim alma prosesi wagtynda, hem-de uky wagtynda ýakymly ysly taýajyklary ulananlarynda olaryň bilim almakda üstünligi 30% töweregi ýokarlandy. Geçirilen barlag sözlük gory bilen bagly test wagtynda ýakymly ysyň bolmagynyň ýadyň kämilleşmegine ýardam edýändigini görkezdi.
Hünärmenler bägüliň ýakymly täsiriniň astynda beýni işjeňligi ýokarlanýar diýip hasaplaýarlar, ýöne muny diňe elektroensefalogrammanyň kömegi bilen kesgitlemek bolýar.