Geely kompaniýasy antiwirusly awtomobilini döreder

Hytaý kompaniýasy epidemiýanyň öňüni almaga mümkinçilik berjek täze tehnologiýalary döretmek bilen meşgullanýar.
Geely hytaý kompaniýasy «has howpsuz awtomobilleriň» işlenip taýýarlanylmagyna 370 mln ýuan (53 mln dollar) möçberinde maýa goýýar. Aýratynam, kärhana salona zyýanly molekulalaryň girmegine mümkinçilik bermeýän toplumlaýyn antiwirus goragly ulaglary döretmek bilen meşgullanar.
Geely-niň Hytaýdaky, ABŞ-daky we Ýewropadaky ylmy-barlag merkezleri antibakterial we wirusa garşy häsiýetli ekologik taýdan durnukly materiallary taýýarlamakda bilelikdäki işi ýola goýarlar. Olar kondisionirlemäniň täze ulgamlarynda hem-de sürüjiniň ýa-da ýolagçynyň eliniň köp degýän ýerlerinde ulanylar. Aýratynam, gürrüň rul, herekete getiriji gutynyň selektory, düwmeler we sensor displeýleri barada gidýär.
«Epidemiýanyň öňüni almak – bu tutuş jemgyýetiň uzak wagtyň dowamynda köp zähmetini talap edýän iş. Awtomobiller – ulagyň has giňden ýaýran görnüşi, biz durmuşymyzyň möhüm bölegini şolarda geçirýäris, olar biz üçin ikinji öýe öwrülýär» – diýip, Geely-niň ýolbaşçysy An Sunhueý belleýär.
Öň Geely kompaniýasy wezipesi koronawirus epidemiýasynyň öňüni almaklyga gönükdiriljek haýyr-sahawat gaznasynyň döredilmegi üçin 200 mln ýuan (28,6 mln dollar) sarp etdi.
Täze koronawirus Hubeý welaýatynyň Uhan şäherinde 2019-njy ýylyň dekabr aýynyň ortalarynda ýüze çykaryldy. Häzirki wagtda 17 müňden gowrak adam bu kesel bilen kesellän, ýogalanlaryň sany bolsa 400-den geçýär. 2020-nji ýylyň 22-nji ýanwarynda Uhanda we goňşy şäherlerde karantin girizildi – hökümet jemgyýetçilik ulaglarynyň gatnawyny togtatdy, şäheri giriş we çykyş üçin ýapdy.
Epidemiýa bilen baglylykda Hytaýda köp sanly iri awtoöndürijiler, şol sanda Tesla, Ford, PSA topary, Nissan we Honda awtomobillerini çykarmagyny bes etdiler. Mundan başga-da, PSA-dan başlap, birnäçe kompaniýalar kesel bilen baglylykda özleriniň tutuş topar personalyny Uhan şäherindäki kärhanadan we onuň çäklerinden çykarmak niýeti barada habar berdiler.